బండ్ల ల‌వ్స్ ప్ర‌కాష్ రాజ్.. లైవ్ లో డ్రామా ర‌క్తి క‌ట్టించారుగా!

మా అసోసియేష‌న్ ఎన్నిక‌లు సిత్ర‌విసిత్రాల్ని ఆవిష్క‌రిస్తున్నాయి. ఒక‌రంటే ఒక‌రికి ప్రేమ‌.. ఒక‌రంటే ఒక‌రికి విరోధం.. ఒక‌రంటే ఒక‌రికి విర‌హం.. ఒక‌రంటే ఒక‌రికి ఎమోష‌న‌ల్ బాండింగ్! అన్న‌ట్టే ఉంది. తాజాగా ప్ర‌కాష్ రాజ్ వ‌ర్సెస్ బండ్ల గ‌ణేష్ ఎపిసోడ్ లో కొత్త ట్విస్టు మ‌రింత‌గా వేడెక్కించింది చానెల్ లైవ్ లో..

లైవ్ లో బండ్ల వ‌ర్సెస్ ప్ర‌కాష్ రాజ్ ఎమోష‌న‌ల్ ల‌వ్ డ్రామా! ఆద్యంతం ర‌క్తి క‌ట్టించింది. ఇంత‌కీ బండ్ల ఏమ‌న్నాడు? ప్ర‌కాష్ రాజ్ ఏమ‌న్నాడు? అన్న‌ది వింటే అవ‌త‌లివాళ్లు అవాక్క‌వుతారు. ఈ మెలోడ్రామా అంతా చూస్తుంటే ఏం జ‌రుగుతోందో అర్థం కాని ప‌రిస్థితి.

మా అధ్య‌క్ష ప‌ద‌వికి ప్ర‌కాష్ రాజ్ అన్న అర్హుడు అని ఆయ‌న గెల‌వాల‌ని బండ్ల గ‌ణేష్ ఆకాంక్షిస్తున్నారు. తాను ఆయ‌న‌కు వ్య‌తిరేకిని కాన‌ని వారు చెడ్డ అని తాను అన‌లేద‌ని కూడా అన్నారు. అంతేకాదు జీవిత రాజ‌శేఖ‌ర్ తాను ఎంత‌గానో ప్రేమించే చిరంజీవి గారిని మెగా ఫ్యామిలీని అన‌రాని మాట‌లు అన‌డం న‌చ్చ‌లేద‌ని అందుకే త‌న‌కు వ్య‌తిరేకంగా జన‌ర‌ల్ సెక్ర‌ట‌రీగా పోటీ చేస్తున్నాన‌ని బండ్ల అన్నారు. తాను ప్ర‌కాష్ రాజ్ కి శ్రీ‌కాంత్ కి వ్య‌తిరేకం కానే కాద‌ని అన్నారు. అంతేకాదు.. ప్ర‌కాష్ రాజ్ అన్న త‌న‌ను టీమ్ లో స‌ర్ధుబాటు చేయ‌లేక‌పోయార‌ని కూడా బండ్ల అన్నారు. ప్ర‌కాష్ రాజ్ గెల‌వాల‌ని ఆల్ ది బెస్ట్ కూడా చెప్పారు. ఆస‌క్తిక‌రంగా.. ఇదే వేదిక‌పై ఓకే బంగారం.. నువ్వు చేసేదే క‌రెక్ట్ అంటూ ప్ర‌కాష్ రాజ్ కూడా బండ్ల‌కు వంత పాడారు. త‌న మ‌న‌స్సాక్షికి ఏం చేయాల‌నిపిస్తే అది చేస్తున్నాడు. అదే క‌రెక్ట్ అని కూడా ప్ర‌కాష్ రాజ్ కితాబిచ్చేశారు. మొత్తానికి చానెల్ లైవ్ లో డ్రామా ర‌క్తి క‌ట్టింది. మునుముందు ఇలాంటి సిత్రాలు ఇంకెన్ని సూడాలో!!