#గుస‌గుస‌.. ఖ‌రీదైన‌ వాచీ క‌లిపిన గ‌బ్బ‌ర్ బంధం!

``ఒక‌ప్పుడు మంచి స్నేహితులు.. క‌లిసి బ్లాక్ బ‌స్ట‌ర్ సినిమా తీసారు. కానీ మ‌ధ్య‌లో తిట్టుకున్నారు.. త‌ర్వాత ఒక‌సారి క‌లిసారు.. మ‌ళ్లీ ఇప్పుడిలా ఫ్రెండ్స‌య్యారు!`` ఇంత‌కీ ఎవ‌రు ఆ ఇద్ద‌రూ? అంటే.. మ‌న‌ జ‌నానికి ప‌రిచ‌యం అవ‌స‌రం లేదు. తెలుగు సినిమా ల‌వ‌ర్స్ కి ఎంత‌గానో సుప‌రిచితులైన బ్లాక్ బ‌స్ట‌ర్ నిర్మాత‌ బండ్ల గ‌ణేష్ .. ద‌ర్శ‌కుడు హ‌రీష్ శంక‌ర్ మ‌ధ్య ఆత్మీయ అనుబంధం ఇప్పుడు చర్చ‌నీయాంశంగా మారింది.

బండ్ల గ‌ణేష్ తాజాగా హ‌రీష్ శంక‌ర్ ని క‌లిసారు. అంతేకాదు ఖ‌రీదైన వాచ్ ని కానుక‌గా ఇచ్చారు. అందుకు సంబంధించిన ఫోటోలు అంత‌ర్జాలంలో వైర‌ల్ గా మారాయి. పాత‌ గొడ‌వ‌లు మ‌రిచి ఇలా మ‌ళ్లీ ఆత్మీయులుగా మారిపోవ‌డం ఆస‌క్తిని క‌లిగిస్తోంద‌ని అభిమానులు వ్యాఖ్యానిస్తున్నారు ఈ ఫోటోలు చూసాక‌.

ఇంత‌కీ ఈ సంద‌ర్భం ఎందుకు వ‌చ్చింది? అంటే.. ప‌వ‌ర్ స్టార్ పవన్ కళ్యాణ్ బ్లాక్ బస్టర్ మూవీ గబ్బర్ సింగ్ నేటితో 10 సంవత్సరాలు పూర్తి చేసుకుంది. టాలెంటెడ్ ఫిల్మ్ మేకర్ హరీష్ శంకర్ దర్శకత్వం వహించిన ఈ చిత్రానికి బండ్ల గ‌ణేష్ నిర్మాత‌.

శృతి హాసన్ కథానాయికగా నటించింది. ఈ మ్యూజిక‌ల్ బ్లాక్ బ‌స్ట‌ర్ సినిమా దశాబ్దం పూర్తి చేసుకున్న సందర్భంగా దర్శకుడు హరీష్ శంకర్ ని నిర్మాత గ‌ణేష్ క‌లిసారు. అంతేకాదు.. ఖరీదైన వాచ్ ను బహుమతిగా ఇచ్చాడు. ప్ర‌స్తుతం ఈ ఫోటోలు సోషల్ మీడియాలో హల్ చల్ చేస్తున్నాయి.

రాజ‌కీయాల్లోనూ సినిమాల్లోనూ శాశ్వ‌త మిత్ర‌త్వం శాశ్వ‌త శ‌త్రుత్వం ఉండ‌దు అనేందుకు ఇది ఉదాహ‌ర‌ణ. ఇక‌పోతే హరీష్ శంకర్ త‌దుప‌రి పవన్ కళ్యాణ్ తో `భవధీయుడు భగత్ సింగ్` సెట్స్ కి వెళ‌తారు. ప్ర‌స్తుతం లైన్ ఓకే చేయించుకుని స్క్రిప్ట్ వర్క్ లో బిజీగా ఉన్నాడు. ఈ మూవీ గురించి మరిన్ని వివ‌రాలు వెల్ల‌డి కావాల్సి ఉంది.

ఇక‌పోతే రాజ‌కీయాల్లోకి వెళ్లిన బండ్ల గ‌ణేష్ ఆ త‌ర్వాత త‌న దేవుడు ప‌వ‌న్ క‌ల్యాణ్ తో సినిమా తీస్తాన‌ని అన్నారు. కానీ అది ఇంత‌వ‌ర‌కూ కుద‌ర‌లేదు. ఇప్పుడిలా గ‌బ్బ‌ర్ సింగ్ కాంబో క‌లిసారు కాబ‌ట్టి ఏదైనా మ్యాజిక్ జ‌రుగుతుందేమో చూడాలి.