బండ్ల గణేష్ పై కన్నేసిన రావిపూడి!

యాక్టర్ కమ్ ప్రొడ్యూసర్ బండ్ల గణేష్ తెలంగాణా ఎన్నికలకు ముందుగా రాజకీయాల్లోకి ఎంట్రీ ఇచ్చి కాంగ్రెస్ పార్టీ తీర్థం పుచ్చుకున్న సంగతి తెలిసిందే. అనుకున్నదొక్కటి అయినది ఒక్కటి.. అన్న చందంగా రాజకీయాల్లో బండ్ల గణేష్ పప్పులేమీ ఉడకలేదు. దీంతో ఈ రాజకీయాలు మనకు అచ్చిరావని నిర్ణయించుకున్న బండ్ల గణేష్ తిరిగి తనకు కలిసొచ్చిన సినిమాలవైపే అడుగులు వేస్తున్నాడని సమాచారం.

త్వరలోనే కమెడియన్ గా కెమెరా ముందుకు వచ్చేందుకు రంగం సిద్ధం చేసుకుంటున్నాడట. అనిల్ రావిపూడి - మహేష్ బాబు కాంబినేషన్లో త్వరలో ఒక సినిమా సెట్స్ మీదకు వెళ్లనున్న సంగతి తెలిసిందే. ఈ సినిమాలో ఒక ఫన్నీ రోల్ ను గణేష్ కు ఆఫర్ చేశారని.. పాత్ర నచ్చడంతో ఎక్కువ ఆలోచించకుండానే గ్రీన్ సిగ్నల్ ఇచ్చాడని సమాచారం. ఫన్నీ పాత్రలను డిజైన్ చేయడంలో అనిల్ రావిపూడి స్పెషలిస్ట్. గణేష్ కోసం మంచి పాత్రే డిజైన్ చేసి ఉంటాడు. రియల్ లైఫ్ లోనే గణేష్ కామెడికి జనాలు పొట్ట చెక్కలయ్యేలా నవ్వుతారు.. ఇక రీల్ లైఫ్ లో మరోసారి తన సత్తా చూపించడం ఖాయమే.

అనిల్ రావిపూడి - మహేష్ బాబు సినిమా జులైలో ప్రారంభం అవుతుంది. ఈ సినిమాలో మహేష్ బాబు సరసన రష్మిక మందన్నను హీరోయిన్ గా ఎంపిక చేశారు. దేవీ శ్రీ ప్రసాద్ ఈ సినిమాకు సంగీత దర్శకుడు కాగా అనిల్ సుంకర-దిల్ రాజు సంయుక్తంగా ఈ చిత్రాన్ని నిర్మిస్తున్నారు.