బండ్ల భజన అందుకేనా?

ఎన్టీఆర్ కెరీర్ లోనే ఆల్ టైం రికార్డ్ కలెక్షన్లు కొల్లగొడుతోంది జైలవకుశ చిత్రం. ఎన్టీఆర్ తొలిసారి త్రిపాత్రిభినయం చేసిన ఈ సినిమాలో జై పాత్రకు ఎన్టీఆర్ పడిన కష్టానికి తగిన ఫలితం దక్కింది. క్రౌర్యం - గాంభీర్యం - కరకుదనం కలగలసిన పాత్రలో ఎన్టీఆర్ నటనకు అంతటా ప్రశంసలు వస్తున్నాయి. సినిమాపై నెగిటివ్ కామెంట్లు వచ్చినా ఎన్టీఆర్ నటనకు మాత్రం అంతా జైకొట్టేశారు.

తాజాగా జైలవకుశ అద్భుతంగా ఉందని ఎన్టీఆర్ ను ఆకాశానికెత్తేస్తూ నిర్మాత - నటుడు బండ్ల గణేష్ ట్విట్టర్ లో ఓ పోస్టు పెట్టాడు. బండ్ల గణేష్ పొగడటం మొదలెడితే ఓ రేంజిలో ఉంటుంది. ఇప్పుడూ అదే పని చేశాడు. ‘జైలవకుశ సినిమా రాత్రి చూశా. నిద్ర పట్ట లేదు! ఎన్.టి.ఆర్ - ఎస్.వి.ఆర్. తరవాత తెలుగు చిత్ర పరిశ్రమలో తారక్ యే’ నంటూ పోస్టు పెట్టాడు. ఇంతకుముందు ఎన్టీఆర్ నటించిన బాద్ షా - టెంపర్ సినిమాలకు బండ్ల గణేష్ ప్రొడ్యూసర్ గా వ్యవహరించాడు. తరవాత బండ్ల గణేష్ కు - ఎన్టీఆర్ మధ్య గ్యాప్ వచ్చి అప్పటి నుంచి అతడిని దూరం పెట్టడం మొదలెట్టాడు. అలాంటిది మళ్లీ ఇప్పుడు ఉన్నట్టుండి ఎన్టీఆర్ భజన మొదలెట్టడం చూసి అభిమానులకు డౌట్ పట్టుకుంది. ఈ భజన ఎన్టీఆర్ సినిమా డేట్ల కోసమా లేక తిరిగి అతడితో సత్సంబంధాలు పెంచుకోవడం కోసమా అన్న ప్రశ్నలు ఫ్యాన్స్ నుంచి వస్తున్నాయి.

ఒకానొక టైంలో పవన్ కళ్యాణ్ - ఎన్టీఆర్ ఇద్దరితో ఒకేసారి సినిమాలు తీసి స్టార్ ప్రొడ్యూసర్ అనే బిరుదు తగిలించుకున్న బండ్ల గణేష్ కు ఇప్పుడు ఎంత ప్రయత్నించినా సినిమా కు డేట్లు దొరకడం లేదు. పాత విషయాలు మరుగున పెట్టి కొత్తగా మంచి చేసుకునే ప్రయత్నాలు ఎప్పటి నుంచో మొదలెట్టాడు. అందుకోసం ఎప్పుడూ వెళ్లే దారిలోనే వెళ్తున్నాడు. హీరోల గొప్పతనాన్ని ఆకాశానికి ఎత్తేయడం ద్వారా వారి మెప్పు పొందేవాడు. మరోసారి ఆ స్ట్రాటజీ వర్కవుటవుతుందేమో.. చూడాలి మరి?