బండ్ల‌న్న మ‌ళ్లీ మంట పెట్టేశాడండోయ్‌!

బండ‌ల్ గ‌ణేష్ సినీ ఫంక్ష‌న్ ల‌లో మైక్ అందుకుంటే చాలు ఏ రేంజ్ లో మాట్లాడ‌తాడో అంద‌రికి తెలిసిందే. ప‌వ‌న్ క‌ల్యాణ్ గురించి త‌ను మాట్లాడే మాట‌లు న‌వ్వులు కురిపిస్తూనే ఫ్యాన్స్ కు పూన‌కాలు తెప్పిస్తుంటాయి. ఒక్క‌సారి మైక్ అందుకుని స్టేజ్ ఎక్క‌డంటే ఎదురుగా ఎవ‌రున్న‌దీ ప‌ట్టించుకోని బండ్ల‌న్న ఓ రేంజ్ లో రెచ్చిపోయి మాట్లాడ‌టం మొద‌లు పెట్టి ఎక్క‌డ ఆపుతాడో.. ఎలాంటి పంచ్ లు వేస్తాడో అని తెలిసినా ఎవ‌రూ ఆప‌లేని ప‌రిస్థితి క‌నిపిస్తూ వుంటుంది.

ఇక ప‌వ‌న్ క‌ల్యాణ్ గురించి మాట్లాడ‌టం మొద‌లు పెట్టాడంటే సెల‌బ్రిటీల పొట్ట చెక్క‌లవ్వాల్సిందే. ఆ రేంజ్ లో బండ్ల‌న్న స్పీచ్ వుంటుంది. అందుకే ఫ్యాన్స్ తో పాటు చాలా మంది బండ్ల‌న్న సినిమా ఫంక్ష‌న్ ల‌కు రావాల‌ని స్టేజ్ పైకొచ్చి మాట్లాడాల‌ని ఎదురు చూస్తుంటారు.

అలా బండ్ల గ‌ణేష్ సినిమా ఫంక్ష‌న్ ల‌లో మాట్లాడిన స్పీచ్ ల‌ని అభిమానులు, నెటిజ‌న్ లు ఓ రేంజ్ లో వైర‌ల్ చేస్తుంటారు. గ‌తంలో ఆకాష్ పూరి న‌టించిన 'చోర్ బ‌జార్‌' ఈవెంట్ లో పాల్గొన్న బండ్ల‌న్న పూరి జ‌గ‌న్నాథ్ ఆ ఈవెంట్‌కి హాజ‌రు కాక‌పోవ‌డంతో త‌న‌పై సంచ‌ల‌న వ్యాఖ్య‌లు చేయ‌డం, అవి వైర‌ల్ కావ‌డం తెలిసిందే.

ఆ త‌రువాత నుంచి బండ్ల గ‌ణేష్ ఎలాంటి సినిమా ఫంక్ష‌న్ ల‌లో క‌నిపించ‌డం లేదు. అంతే కాకుండా గ‌త కొంత కాలంగా ప‌వ‌ర్ స్టార్ ప‌వ‌న్ క‌ల్యాణ్ కు బండ్ల గ‌ణేష్ దూరంగా వుంటూ వ‌స్తున్నారు. ఇదిలా వుంటే చాలా రోజుల త‌రువాత బండ్ల గ‌ణేష్ మాస్ మ‌హారాజా ర‌వితేజ న‌టించిన 'ధామాకా' స‌క్సెస్ సెల‌బ్రేష‌న్స్ మీట్ లో పాల్గొన్నాడు. చాలా రోజుల త‌రువాత మైక్ ప‌ట్టి స్టేజ్ ఎక్క‌డిన బండ్ల గ‌ణేష్ ..మాస్ మ‌హారాజా ర‌వితేజ‌పై ఓ రేంజ్ లో ప్ర‌శంస‌ల వ‌ర్షం కురిపించాడు.

అయితే ఈ సంద‌ర్భంగా బండ్ల గ‌ణేష్ చేసిన వ్యాఖ్య‌లపై మెగా ఫ్యాన్స్ మండిప‌డుతున్నారు. 'ధ‌మాకా' సక్సెస్ సెల‌బ్రేష‌న్స్ లో పాల్గొన్న బండ్ల గ‌ణేష్ ర‌వితేజ‌పై ప్ర‌శంస‌లు కురిపిస్తూనే వివాదాస్ప‌ద వ్యాఖ్య‌లు చేయ‌డం స‌రికొత్త వివాదానికి తెర‌లేపింది. అదృష్టం వుంటే ఎవ‌రైనా సూప‌ర్ స్టార్లు, మెగాస్టార్లు అయిపోతార‌ని చెప్ప‌డ‌మే ఇప్పుడు స‌రికొత్త వివాదానికి తెర‌లేపింది. ఈ మాట‌ల్ని త‌ప్పుగా అర్థం చేసుకున్న అభిమానులు నెట్టింట బండ్ల‌న్న‌పై ఫైర్ అవుతున్నారు.

ప‌వ‌ర్ స్టార్ ప‌వ‌న్ క‌ల్యాణ్ తో బ్యాక్ టు బ్యాక్ రెండు సినిమాలు చేశావు.. అది అదృష్టం వ‌ల్లే చేశావా? అంటూ నిల‌దీస్తున్నారు. బండ్ల‌న్న వ్యాఖ్య‌ల‌పై మెగా ఫ్యాన్స్ తో పాటు మ‌హేష్ ఫ్యాన్స్ కూడా మండిప‌డుతుండ‌టంతో బండ్ల గణేష్ వ్యాఖ్య‌లు ఇప్పుడు నెట్టింట వైర‌ల్ గా మారాయి. నిర్మాత‌గా తొలి అవ‌కాశం ర‌వితేజ ఇచ్చాడు కాబ‌ట్టి త‌న‌ని పొగ‌డ‌టంలో త‌ప్పులేద‌ని, అందు కోసం మాస్టార్ల‌ని అంత‌మాట అంటావా? అంటూ మెగా, ఘ‌ట్ట‌మ‌నేని ఫ్యాన్స్ ఫైర్ అవుతున్నారు. దీనిపై బండ్ల‌న్న ఎలాంటి వివ‌ర‌ణ ఇస్తాడో చూడాలి మరి.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.