త్వరలోనే బంగార్రాజు సెట్స్ పైకి..

టాలీవుడ్ కింగ్ అక్కినేని నాగార్జున హీరోగా కళ్యాణ్ కృష్ణ కురసాల దర్శకత్వంలో నటించిన సినిమా సోగ్గాడే చిన్నినాయన. 2016లో విడుదలైన ఈ సినిమా బాక్సాఫీస్ వద్ద సూపర్ హిట్ అయింది. ఆ సినిమా తర్వాత మళ్లీ ఆ రేంజి హిట్ అందుకోలేకపోయాడు కింగ్ నాగ్. అయితే సోగ్గాడే చిన్నినాయన సినిమా విడుదలై హిట్టు కొట్టిన వెంటనే నాగార్జున డైరెక్టర్ కలిసి దీనికి సీక్వెల్ కూడా ఉంటుందని ప్రకటించారు. అంతేగాక సీక్వెల్ కు బంగార్రాజు అనే టైటిల్ కూడా ఖరారు చేసేసారు. ఇందులో నాగార్జున పోషించే పాత్ర బంగార్రాజు. అయితే ఎందుకో గాని అనేక కారణాల వలన బంగార్రాజు ఇంతవరకు మొదలుకాలేదు. ఈ గ్యాప్ లో డైరెక్టర్ కళ్యాణ్ రారండోయ్ వేడుక చేద్దాం, నేలటికెట్టు సినిమాలు చేసాడు. అయితే బంగార్రాజు మూవీ గతేడాది ఉగాదికే ప్రారంభం కావాల్సింది. కానీ కరోనా కారణంగా వాయిదా పడింది.

ఇప్పుడు ఈ మూవీ సెట్స్ పైకి వెళ్లేందుకు సర్వం సిద్ధం అంటుందట. తాజా సమాచారం ప్రకారం.. బంగార్రాజు మూవీ ఫిబ్రవరి రెండవ వారం నుండే షూటింగ్ స్టార్ట్ అవుతుందని టాక్. బంగార్రాజు స్క్రిప్ట్ గురించి డైరెక్టర్ కళ్యాణ్ ఏడాది కాలంగా కష్టపడుతున్నాడు. అంతేగాక సినిమాకు సంబంధించిన ప్రీ-ప్రొడక్షన్ పనులు కూడా పూర్తి చేసాడట. నాగార్జున వైల్డ్ డాగ్ సినిమా కంప్లీట్ చేయగానే బంగార్రాజు షూటింగ్ లో పాల్గొంటాడట. అయితే వీలైనంత తక్కువ టైంలో బంగార్రాజు సినిమా కంప్లీట్ చేయాలనీ డైరెక్టర్ భావిస్తున్నట్లు తెలుస్తుంది. అందుకోసమే చిత్రయూనిట్ బ్యాక్ టు బ్యాక్ షెడ్యూల్స్ ప్లాన్ చేసిందట. ఇదిలా ఉండగా బంగార్రాజు షూటింగ్ డేట్ ఎప్పుడు ప్రకటిస్తారో అంటూ అక్కినేని అభిమానులు ఎదురుచూస్తున్నారు. ఈ సినిమాలో రమ్యకృష్ణ, నాగచైతన్యలు చెరో పాత్రలలో కనిపిస్తారని సమాచారం. అన్నపూర్ణ స్టూడియోస్ ఈ సినిమాను నిర్మిస్తోంది. త్వరలోనే అధికారిక ప్రకటన రానుందట.