పంచె క‌ట్టినా.. మీసం తిప్పినా.. బంగార్రాజు వెరీ స్పెష‌ల్!

కింగ్ నాగార్జున క‌థానాయ‌కుడిగా న‌టిస్తున్న తాజా చిత్రం `బంగార్రాజు`. `డెవిల్ ఈజ్ బ్యాక్` అనేది క్యాప్షన్. ఇందులో నాగ‌చైత‌న్య మ‌రో ప్ర‌ధాన పాత్ర‌ను పోషిస్తున్నారు. బ్లాక్ బస్టర్ `సోగ్గాడే చిన్ని నాయన`కు ప్రీక్వెల్ క‌థ‌తో ఈ సినిమాని తెర‌కెక్కిస్తున్నామ‌ని క‌ళ్యాణ్ కృష్ణ ఇంత‌కుముందు వెల్ల‌డించారు. నాగార్జున బ‌ర్త్ డే సంద‌ర్భంగా నేడు ప్రత్యేక పోస్టర్ ని లాంచ్ చేసి పుట్టినరోజు శుభాకాంక్షలు తెలిపింది చిత్ర‌బృందం.

పోస్ట‌ర్ లో ప‌ట్టు పంచెలో బంగార్రాజు గెట‌ప్ లో నాగ్ ఎంతో ఇస్మార్ట్ గా క‌నిపిస్తున్నారు. అలా మీసం తిప్పేస్తూ మ‌గువ‌ల‌కు ఛాలెంజ్ విసురుతున్న‌ట్టే క‌నిపిస్తోంది. సోగ్గాడే చిన్నినాయ‌నా ఫీట్ ని తిరిగి రిపీట్ చేస్తున్నాం అనే హింట్ ని ఇస్తూ... నాగ్ లుక్ కానీ అత‌డి ఆహార్యం కానీ ఏదీ మార‌లేదు. పంచె క‌ట్టులో స్టైలిష్ గా పెద్ద‌మ‌నిషిలా క‌నిపిస్తూనే అలా బ్లాక్ గాగుల్ ధ‌రించి త‌నదైన స్టైలిష్ ఆహార్యాన్ని కొన‌సాగిస్తున్నాడు.

ఇందులో నాగ్ స‌ర‌స‌న ర‌మ్య‌కృష్ణ న‌టిస్తుండ‌గా ప‌లువురు క‌థానాయిక‌లతో క‌ల‌ర్ ఫుల్ ఫ్రేమ్ లు హైలైట్ గా నిలుస్తాయ‌ని స‌మాచారం. అలాగే నాగ‌చైత‌న్య స‌ర‌స‌న ఉప్పెన బ్యూటీ కృతి శెట్టి న‌టిస్తోంది. ఈ సినిమాలో స‌మంత న‌టిస్తుంద‌ని భావించినా అనూహ్యంగా త‌న స్థానంలో కృతిని ఎంపిక చేయ‌డం అభిమానుల‌ను ఆశ్చ‌ర్య‌ప‌రిచింది. బంగార్రాజుగా నాగ్ లుక్ అదిరింది. అందుకు త‌గ్గ‌ట్టే సినిమాలో కంటెంట్ తోనూ మెప్పిస్తారనే అభిమానులు వేచి చూస్తున్నారు. ఈ చిత్రానికి కళ్యాణ్ కృష్ణ కురసాల దర్శకత్వం వహిస్తున్నారు. అన్నపూర్ణ స్టూడియోస్ జీ స్టూడియోస్ తో కలిసి నిర్మిస్తోంది.

కింగ్ నాగార్జున పుట్టినరోజు సంద‌ర్భంగా అభిమానులు స‌హా కొలీగ్స్ నుంచి శుభాకాంక్షలు వెల్లువెత్తుతున్న సంగ‌తి తెలిసిందే. ఇంత‌కుముందే అక్కినేని నాగ‌చైత‌న్య .. అఖిల్ స‌హా స‌మంత నాగ్ కి విషెస్ తెలిపారు. మామ గారు జీవితాంతం ఆయురారోగ్యాల‌తో ఆనందంగా ఉండాల‌ని స‌మంత ప్ర‌త్యేకంగా శుభాకాంక్ష‌లు అందించారు. అలాగే ఆయ‌న‌కు శుభాకాంక్ష‌లు చెబుతూ క్రియేటివ్ డైరెక్టర్ ప్రవీణ్ సత్తారు .. చిత్ర నిర్మాతలు నారంగ్ బృందం నాగ్ మూవీ టైటిల్ ఫస్ట్ లుక్ పోస్టర్ ను విడుదల చేశారు. హై-ఆక్టేన్ యాక్షన్ ఎంటర్ టైనర్ క‌థాంశంతో రూపొందుతున్న ఈ సినిమా టైటిల్ ఘోస్ట్ అని ప్ర‌క‌టించ‌డంతో అభిమానులు స‌ర్ ప్రైజ్ అయ్యారు. టైటిల్ పోస్ట‌ర్ డార్క్ షేడ్ లో ప్ర‌త్యేకంగా ఆక‌ర్షించింది. ఈ సినిమాలో కాజల్ అగర్వాల్ కథానాయిక‌. నారాయణ్ దాస్ కె నారంగ్- పుస్కూర్ రామ్ మోహన్ రావు .. శరత్ మరార్ ఈ చిత్రాన్ని శ్రీ వెంకటేశ్వర సినిమాస్ LLP -నార్త్ స్టార్ ఎంటర్ టైన్ మెంట్ బ్యానర్ లపై నిర్మిస్తున్నారు. గుల్ పనాగ్ - అనిఖా సురేంద్రన్ ప్ర‌ధాన‌ తారాగణం. ప్రస్తుతం హైదరాబాద్ లో చిత్రీకరణ జరుగుతోంది ఇందులో ప్రధాన తారాగణం పాల్గొంటోంది. గుల్ పనాగ్ - అనిఖా సురేంద్రన్ త‌దిత‌రులు న‌టిస్తున్నారు. ముఖేష్ జి ఈ చిత్రానికి ఛాయాగ్ర‌హ‌ణం అందిస్తుండ‌గా.. బ్రహ్మ కడలి ఆర్ట్ డైరెక్టర్ గా వ‌ర్క్ చేస్తున్నారు. రాబిన్ సుబ్బు నభా మాస్టర్ స్టంట్స్ అందిస్తున్నారు.

ప్రియ‌మైన నాగ్ కి శుభాకాంక్ష‌లు!- అమ‌ల అక్కినేని

నేడు నాగార్జ‌న బ‌ర్త్ డే సంద‌ర్భంగా శ్రీ‌మ‌తి అక్కినేని అమ‌ల ప్ర‌త్యేక ట్వీట్ ద్వారా శుభాకాంక్ష‌లు తెలిపారు. ఈ రోజు మీకు నా ప్ర‌త్యేక‌ పుట్టినరోజు శుభాకాంక్షలు.. మంచి ఆరోగ్యం.. ఆనందం.. సంతృప్తి .. ఎదురుచూడటానికి చాలా ఉంది. నా ప్రియమైన మీతో ఇలా చాలా సంతోషంగా ఉంది ... ప్రియమైన నాగ్.. అంటూ అమ‌ల శుభాకాంక్ష‌లు తెలిపారు. శుభాకాంక్షలు పంపుతున్న అభిమానులు..శ్రేయోభిలాషులంద‌రికీ ధన్యవాదాలు తెలిపారు. అభిమానులు సుర‌క్షితంగా ఉండాల‌ని అమ‌ల సూచించారు.