అక్కినేని హీరోల 'బంగార్రాజు' మొదలైంది..!

కింగ్ అక్కినేని నాగార్జున - యువసామ్రాట్ నాగచైతన్య హీరోలుగా ''బంగార్రాజు'' అనే సినిమా తెరకెక్కనున్న విషయం తెలిసిందే. కల్యాణ్ కృష్ణ కురసాల ఈ చిత్రానికి దర్శకత్వం వహించనున్నారు. ఇందులో నాగ్ సరసన రమ్యకృష్ణ.. చైతూ కు జోడీగా కృతి శెట్టి హీరోయిన్ గా నటిస్తున్నారు. ఈరోజు(ఆగస్టు 20) శుక్రవారం ఈ చిత్రాన్ని పూజా కార్యక్రమాలతో లాంఛనంగా ప్రారంభించారు.

హైదరాబాద్‌ లోని అన్నపూర్ణ స్టూడియోలో జరిగిన ''బంగార్రాజు'' సినిమా ముహూర్తపు కార్యక్రమానికి నాగార్జున - నాగచైతన్య - కృతి శెట్టి - డైరెక్టర్ కళ్యాణ్ కృష్ణ - మ్యూజిక్ డైరెక్టర్ అనూప్ రూబెన్స్ - నాగ సుశీల తదితరులు హాజరయ్యారు. ఈ సినిమా రెగ్యులర్ షూటింగ్ ఈ నెల 25 నుంచి జరగనుందని సమాచారం. ఇప్పటికే దీని కోసం ఆర్ట్ డైరెక్టర్ రవీందర్ నేతృత్వంలో సెట్స్ నిర్మాణం కూడా పూర్తైనట్లు తెలుస్తోంది.

నాగ్ కెరీర్ లో బ్లాక్ బస్టర్ హిట్ అయిన ‘సోగ్గాడే చిన్నినాయనా’ చిత్రానికి ప్రీక్వెల్‌ గా ''బంగార్రాజు'' సినిమా రూపొందనుందనే సంగతి తెలిసిందే. అన్నపూర్ణ స్టూడియోస్ బ్యానర్ పై అక్కినేని నాగార్జున ఈ చిత్రాన్ని నిర్మిస్తున్నారు. ‘సోగ్గాడే చిన్నినాయనా’ మూవీకి వర్క్ చేసిన నటీనటులు సాంకేతిక నిపుణులు ఈ చిత్రాంలోనూ భాగం కానున్నారు. దీనికి సంబంధించిన ఇతర వివరాలు అధికారికంగా వెల్లడించాల్సి ఉంది.