పిడుగురాళ్లలో బాలయ్య పిడుగులు.. లొకేషన్ ఫైనల్

నందమూరి అభిమానులు ఎప్పుడెప్పుడా అని ఎదురు చూస్తున్న మూవీ బీబీ3. బోయపాటి శ్రీను-బాలయ్య కాంబినేషన్ లో వస్తున్న మూడో చిత్రమిది. సింహా, లెజెండ్ వంటి బ్లాక్ బస్టర్ హిట్ సినిమాల తర్వాత వీరి కాంబోలో వస్తున్న మూవీ కావడంతో ఇటు ఫ్యాన్స్ తోపాటు, అటు ప్రేక్షకుల్లోనూ భారీ అంచనాలు నెలకొని ఉన్నాయి.

కాగా.. ఈ సినిమాకి సంబంధించిన కీలకమైన యాక్షన్ సన్నివేశాల చిత్రీకరణ ప్రస్తుతం శరవేగంగా జరుగుతున్న సంగతి తెలిసిందే. అయితే.. వచ్చే వారంలో జరగనున్న షెడ్యూల్ లో యాక్షన్ సీక్వెన్స్ తెరకెక్కించబోతున్నారు. ఇందుకోసం పిడుగురాళ్లలో లోకేషన్ చూశారట. ఈ చిత్రీకరణలో ఎక్కువగా పోరాట సన్నివేశాలే ఉంటాయని టాక్. పిడుగురాళ్లకు దగ్గరలో పూర్తిగా పలుకురాళ్ళతో నిండిన ఓ గుట్టకు సంబంధించిన కొన్ని ప్రత్యేకమైన లొకేషన్స్ ను కూడా ఫైనల్ చేసిన్నట్టు సమాచారం.

ఇక ఈ సినిమాలో బాలయ్యకు జోడీగా ప్రగ్యా జైస్వాల్, పూర్ణ నటిస్తున్నారు. మరొక ప్రముఖ నటుడు శ్రీకాంత్ ఇందులో నెగెటివ్ రోల్ చేస్తుండగా ప్రధాన ప్రతినాయకుడు ఎవరనేది ఇంకా బయటపెట్టలేదు టీమ్. ద్వారక క్రియేషన్స్‌ పతాకంపై మిర్యాల రవీందర్‌రెడ్డి ఈ చిత్రాన్ని నిర్మిస్తున్నారు. తమన్‌ సంగీతం అందిస్తున్నారు.