విజయ్ బీస్ట్ మోడ్ ఆన్.. మరోసారి మ్యూజిక్ చేసిన అనిరుధ్..!

కోలీవుడ్ స్టార్ హీరో విజయ్ కు ఉన్న ఫాలోయింగ్ గురించి ప్రత్యేకించి చెప్పనవసరం లేదు. గత కొంతకాలంగా బ్యాక్ టూ బ్యాక్ బ్లాక్ బస్టర్స్ అందుకున్న దళపతి.. డబ్బింగ్ సినిమాలతో తెలుగులోనూ మార్కెట్ ఏర్పరచుకున్నారు. చివరగా 'మాస్టర్' సినిమాతో తన స్టామినా ఏంటో చూపించిన విహాయ్.. ఇప్పుడు ''బీస్ట్'' అనే పాన్ ఇండియా మూవీతో ప్రేక్షకుల ముందుకు వస్తున్నారు.

''బీస్ట్'' చిత్రాన్ని తెలుగు తమిళ మలయాళ కన్నడ హిందీ భాషల్లో ఏప్రిల్ 13న ప్రపంచ వ్యాప్తంగా విడుదల చేయనున్నారు. ఈ నేపథ్యంలో ప్రమోషన్స్ స్పీడ్ పెంచిన మేకర్స్.. వరుస అప్డేట్స్ తో సినిమాపై అంచనాలు రెట్టింపు చేస్తున్నారు. దీన్నుంచి ఏ చిన్న అప్డేట్ వచ్చినా అది క్షణాల్లో వైరల్ అవుతోంది.

ఇప్పటి వరకు విడుదల చేయబడిన బీస్ట్ ప్రచార చిత్రాలు - ట్రైలర్ అనూహ్య స్పందన తెచ్చుకున్నాయి. అలానే 'అరబిక్ కుత్తు - హలమితి హబీబో' 'జాలీ ఓ జింఖానా' పాటలు సోషల్ మీడియాలో సెన్సేషన్ క్రియేట్ చేశాయి. ఈ నేపథ్యంలో తాజాగా థర్డ్ సింగిల్ లిరికల్ వీడియోని చిత్రం బృందం ఆవిష్కరించింది.

'బీస్ట్ మోడ్' అంటూ వచ్చిన ఈ సాంగ్ ఫ్యాన్స్ కు ఫీస్ట్ అనే చెప్పాలి. సినిమాలో స్పై ఏజెంట్ గా కనిపిస్తున్న విజయ్ పాత్రను ఎలివేట్ చేసేలా ఈ పాట ఉంది. ఇందులో సినిమాలోని స్టైలిష్ యాక్షన్ సీక్వెన్స్ లను చూపించారు. అనిరుధ్ రవిచంద్రన్ మరోసారి అదిరిపోయే ట్యూన్ ఇచ్చారు. దీనికి 'మీనర్ లీనర్ స్ట్రాంగర్.. కెన్ యూ ఫీల్ ది పవర్ టెర్రర్ పవర్..' అంటూ వివేక్ లిరిక్స్ రాశారు.

''బీస్ట్'' చిత్రానికి నెల్సన్ దిలీప్ కుమార్ దర్శకత్వం వహించారు. ఇందులో విజయ్ సరసన పూజా హెగ్డే హీరోయిన్ ‏గా నటించింది. డైరెక్టర్ సెల్వరాఘవన్ – యోగిబాబు కీలక పాత్రల్లో కనిపించనున్నారు. మనోజ్ పరమహంస దీనికి సినిమాటోగ్రఫీ అందించగా.. ఆర్. నిర్మల్ ఎడిటింగ్ వర్క్ చేసారు.

సన్ పిక్చర్స్ బ్యానర్ పై కళానిధి మారన్ ఈ చిత్రాన్ని భారీ బడ్జెట్ తో నిర్మించారు. తెలుగులో ప్రముఖ నిర్మాత దిల్ రాజు ఈ సినిమాని విడుదల చేయనున్నారు. ఈ నేపథ్యంలో తెలుగులోనూ ప్రమోషన్స్ చేస్తున్నారు. ఈ సినిమా విజయ్ కి ఎలాంటి విజయాన్ని అందిస్తుందో చూడాలి.