'బీస్ట్' మోడ్ ఆన్.. సమ్మర్ రేసులోకి విజయ్..!

'మాస్టర్' సినిమాతో బ్లాక్ బస్టర్ అందుకున్న కోలీవుడ్ స్టార్ హీరో, ఇళయ దళపతి విజయ్‌ నటిస్తున్న లేటెస్ట్ మూవీ ''బీస్ట్'' (BEAST). 'డాక్టర్' ఫేమ్ నెల్సన్‌ దిలీప్‌ కుమార్‌ దర్శకత్వంలో ఈ సినిమా తెరకెక్కుతోంది. ఇందులో పూజా హెగ్డే హీరోయిన్ గా నటిస్తోంది.

విజయ్ పుట్టినరోజు సందర్భంగా విడుదల చేసిన 'బీస్ట్' టైటిల్ పోస్టర్ అండ్ రెండు ఫస్ట్ లుక్స్ అనూహ్య స్పందన తెచ్చుకున్నాయి. ఈ క్రమంలో 2022 నూతన సంవత్సరం శుభాకాంక్షలు తెలుపుతూ.. తాజాగా మరో కొత్త పోస్టర్ ని చిత్ర యూనిట్ రిలీజ్ చేసింది.

ఫస్ట్ లుక్ లో విజయ్ ని ఒక షార్ప్ షూటర్ గా స్టైలిష్ గా చూపించారు. ఇప్పుడు లేటెస్టుగా వదిలిన పోస్టర్ లో మొహం మీద గాట్లు మరకలతో.. తెల్లటి గడ్డంతో విజయ్ ఇంటెన్స్ 'బీస్ట్' లుక్ ని ప్రెజెంట్ చేశారు. ఈ లుక్ అభిమానులను విపరీతంగా ఆకట్టుకుంటోంది.

ఈ సందర్భంగా ''బీస్ట్'' రిలీజ్ డేట్ ని మేకర్స్ అధికారికంగా ప్రకటించారు. సమ్మర్ కానుకగా ఏప్రిల్ నెలలో ఈ చిత్రాన్ని విడుదల చేయనున్నట్లు తెలిపారు. అయితే అదే సీజన్ లో తెలుగులో మహేష్ బాబు 'సర్కారు వారి పాట' మరియు 'కేజేయఫ్: చాప్టర్ 2' 'లాల్ సింగ్ చద్దా' వంటి పాన్ ఇండియా సినిమాలు ప్రేక్షకుల ముందుకు రానున్నాయి.

ఇప్పటికే 'బీస్ట్' సినిమా షూటింగ్ కంప్లీట్ చేసుకొని.. పోస్ట్ ప్రొడక్షన్ లోకి అడుగుపెడుతోంది. మరి ఈ సినిమా కోసం ఏప్రిల్ నెలలో ఏ తేదీని లాక్ చేస్తారో మేకర్స్ త్వరలోనే ప్రకటిస్తారేమో చూడాలి. 'మాస్టర్' చిత్రంతో విజయ్ కు తెలుగులో కూడా మార్కెట్ పెరిగినందున.. ఇక్కడ కూడా భారీ స్థాయిలో ఈ సినిమా విడుదలయ్యే అవకాశాలు ఉన్నాయి.

కళానిధి మారన్ సమర్పణలో సన్‌ పిక్చర్స్ బ్యానర్ పై భారీ బడ్జెట్ తో ఈ చిత్రాన్ని నిర్మిస్తున్నారు. అనిరుధ్‌ రవిచందర్‌ సంగీతం సమకూరుస్తున్నారు. మనోజ్ పరమహంస సినిమాటోగ్రఫీ అందించగా.. ఆర్. నిర్మల్ ఎడిటింగ్ వర్క్ చేస్తున్నారు.

ఫైట్ మాస్టర్స్ ద్వయం అన్బు-అరివ్ యాక్షన్ కొరియోగ్రఫీ చేయగా.. జానీ మాస్టర్ అన్ని పాటలకు డ్యాన్స్ కొరియోగ్రఫీ చేశారు. సక్సెస్ జోష్ లో ఉన్న విజయ్ - నెల్సన్‌ దిలీప్‌ కలిసి ''బీస్ట్'' సినిమాతో ఎలాంటి విజయాన్ని అందుకుంటారో చూడాలి.