వీడియో సాంగ్: 'మాస్ట్రో' నుంచి బ్యూటిఫుల్ 'వెన్నెల్లో ఆడపిల్ల'

యూత్ స్టార్ నితిన్ - ఇస్మార్ట్ బ్యూటీ నభా నటేష్ హీరోహీరోయిన్లుగా తెరకెక్కుతున్న తాజా చిత్రం ''మాస్ట్రో''. మేర్లపాక గాంధీ దర్శకత్వంలో ఈ బ్లాక్ కామెడీ క్రైమ్ థ్రిల్లర్ రూపొందుతోంది. మిల్కీ బ్యూటీ తమన్నా భాటియా కీలక పాత్ర పోషిస్తున్న ఈ చిత్రంలో నితిన్ అంధుడిగా ఛాలెంజింగ్ రోల్ ప్లే చేస్తున్నారు. ఇప్పటికే షూటింగ్ పూర్తి చేసుకున్న ఈ చిత్రానికి సంబంధించిన పోస్ట్ ప్రొడక్షన్ వర్క్స్ జరుగుతున్నాయి. మూవీ ప్రమోషన్స్ భాగంలో 'మాస్ట్రో మ్యూజిక్ ఫెస్ట్' పేరుతో సాంగ్స్ రిలీజ్ చేస్తున్న మేకర్స్.. తాజాగా 'వెన్నెల్లో ఆడపిల్ల' అనే మరో సాంగ్ ఫుల్ వీడియోని విడుదల చేశారు.

'అనగనగగా అందమైన కథగా.. మొదలైన ఈ మనసే.. నువ్వు లేక జతగా.. ఉండనీదు తెలుసా.. వెన్నెల్లో ఆడపిల్లే తనా.. ఈ చీకటై మిగిలానా' అంటూ సాగిన ఈ పాట శ్రోతలను విశేషంగా ఆకట్టుకుంటోంది. ప్రేయసికి దూరమైన ప్రియుడు.. ఆమెను తలచుకుంటూ బాధతో పాడుకునే విరహ గీతంగా అనిపిస్తుంది. దీనికి మహతి స్వర సాగర్ శ్రావ్యమైన బాణీలు సమకూర్చగా.. స్వీకర్ అగస్తి తనదైన శైలిలో వినసొంపుగా ఆలపించారు. శ్రీజో - కృష్ణ చైతన్య కలిసి ఈ పాటకు మంచి సాహిత్యం అందించారు.

అంధుడైన నితిన్ పియానో వాయిస్తూ ఈ 'వెన్నెల్లో ఆడపిల్లే' సాంగ్ పాడుతూ.. తన ప్రేయసి నభా నటేష్ తో తన జ్ఞాపకాలను గుర్తు చేసుకుంటున్నాడు. ఇందులో నితిన్ - నభా కెమిస్ట్రీ బాగా కుదిరించి. పాట చివర్లో తమన్నా - న‌రేష్‌ - జిషుసేన్ గుప్తా - మంగ్లీ కూడా కనిపించారు. ఆడియో పరంగానే కాకుండా.. విజువల్ గా కూడా ఈ సాంగ్ బ్యూటిఫుల్ గా ఉంది. దీనికి శేఖర్ మాస్టర్ కొరియోగ్రఫీ చేశారు. జె యువ‌రాజ్ సినిమాటోగ్రఫీ అందించగా.. ఎస్.ఆర్ శేఖర్ ఎడిటింగ్ వర్క్ చేశారు.

కాగా, ''మాస్ట్రో'' చిత్రం హిందీలో బ్లాక్ బస్టర్ హిట్ అయిన 'అంధాదున్' చిత్రానికి అధికారిక తెలుగు రీమేక్ గా రూపొందుతోంది. రాజ్ కుమార్ ఆకెళ్ల సమర్పణలో శ్రేష్ఠ మూవీస్ బ్యానర్ పై ఎన్.సుధాకర్ రెడ్డి - నికిత రెడ్డి ఈ చిత్రాన్ని నిర్మిస్తున్నారు. ఇప్పటికే విడుదలైన ప్రచార చిత్రాలు - ఫస్ట్ లుక్ పోస్టర్ - టీజర్‌ విశేష స్పందన తెచ్చుకున్నాయి. ఇప్పుడు 'వెన్నెల్లో ఆడపిల్లే' పాట కూడా అనూహ్య స్పందన తెచ్చుకుంటోంది. మేకర్స్ త్వరలోనే మాస్ట్రో విడుదల తేదీని ప్రకటించనున్నారు.