ఇది కూడా నో కాంప్రోమైజే!

డెబ్యూ మూవీ అల్లుడు శీను నుంచి సాక్ష్యం దాకా భారీతనాన్ని ప్రతి ఫ్రేములోనూ చూపించే సినిమాల్లోనే నటించిన బెల్లంకొండ సాయి శ్రీనివాస్ కొత్త సినిమా కవచం టీజర్ నిన్న విడుదలైన సంగతి తెలిసిందే. శ్రీనివాస్ మామిళ్ళను దర్శకుడిగా పరిచయం చేస్తూ తీసిన ఈ సినిమా తొలుత రీజనబుల్ బడ్జెట్ లో తీసారనే టాక్ కాస్త జోరుగానే నడిచింది. కానీ టీజర్ చూసాక మాత్రం అది నిజం కాదనే అనుమానం రావడం సహజం. మంచి ఫామ్ లో ఉన్న కాజల్ అగర్వాల్ డిమాండ్ ఉన్న మెహ్రీన్ తో పాటు సీనియర్ కెమెరామెన్ చోటా కె నాయుడుతో పాటు పీక్స్ లో ఉన్న తమన్ ను సంగీత దర్శకుడిగా సెట్ చేసుకోవడం చూస్తే ఇది చిన్న సెటప్ అంటే ఒప్పుకోవడం కష్టమే.

పైగా సాహో లాంటి ప్రెస్టీజియస్ మూవీని మాత్రమే ఒప్పుకున్న బాలీవుడ్ విలన్ నీల్ నితీష్ కవచంలో ఉన్నాడంటే చిన్న విషయం కాదుగా. కథ ఎంతో ఎగ్జైట్ చేసుంటే తప్ప ఓకే చెప్పి ఉండడు. ఇన్ని ప్రత్యేకతలు ఉన్నప్పుడు దీన్ని బడ్జెట్ మూవీ కింద పరిగణించడం కష్టమే. డిసెంబర్ లో విడుదల ప్లాన్ చేసిన కవచం తనకు మొదటి బ్రేక్ అవుతుందనే నమ్మకంతో ఉన్నాడు సాయి శ్రీనివాస్. నిన్న జరిగిన టీజర్ లాంచ్ లో టీమ్ కూడా ఇదే ధీమాను వ్యక్తం చేసింది. పోలీస్ బ్యాక్ డ్రాప్ లో యాక్షన్ థ్రిల్లర్ గా రూపొందిన కవచంలో మేకింగ్ పరంగా రాజీ పడిన దాఖలాలు లేవు కాబట్టి సాయి శ్రీనివాస్ ఫ్యాన్స్ ఎదురు చూసే భారీ అంశాలకు కొదవలేనట్టే కనిపిస్తోంది.

ఇది కాకుండా తేజ దర్శకత్వంలోనూ ఓ సినిమా చేస్తున్న సాయి శ్రీనివాస్ మరో రెండు ప్రాజెక్ట్స్ లైన్ లో పెట్టాడు. ఏడాదికి కనీసం రెండు లేదా మూడు సినిమాలకు తక్కువ కాకుండా ప్లాన్ చేసుకుంటున్న బెల్లం హీరోకు కవచం రక్షణగా నిలుస్తుందనే అంచనాలో ఉన్నారు అభిమానులు.