అప్పుడే రెండు కోట్ల హీరోయిన్?

రకుల్ ప్రీత్ సింగ్ కెపాసిటీ ఎంత ? ఆమె రెమ్యూనరేషన్ ఎంత ? పెద్దగా ఉండదులే అనే అనుకుంటారు ఎవరైనా. దీనికి కారణం.. ఇప్పటివరకూ రకుల్ ఖాతాలో ఒక్కటంటే ఒక్క బ్లాక్ బస్టర్ కూడా లేకపోవడమే.

కానీ రకుల్ లెక్కలు వేరేగా ఉన్నాయి. పెద్ద స్టార్లతో తప్ప, అసలు చిన్న హీరోలతో సినిమాలు అంగీకరించడమే లేదు. తనతో పాటు అరంగేట్రం చేసిన సందీప్ కిషన్ కి కూడా ఈ మధ్య నో చెప్పేసిన ఘనాపాటి ఈమె. అలాంటి రకుల్ ని.. ఓ ప్రొడ్యూసర్ భారీ రెమ్యూనరేషన్ ఆఫర్ ఇచ్చి ఆశ్చర్యపరిచాడు. పెద్ద పెద్ద పారితోషికాలతో.. తన కొడుకు బెల్లంకొండ శ్రీనివాస్ పక్కన స్టార్ హీరోయిన్లను తీసుకొస్తున్న బెల్లంకొండ సురేష్.. ఇప్పుడు రకుల్ కి కూడా మతిపోయే ఆఫర్ ఒకటి ఇచ్చాడు. ప్రస్తుతం భీమినేని శ్రీనివాసరావుతో స్పీడున్నోడు అనే రీమేక్ చేస్తున్న బెల్లంకొండ శ్రీనివాస్.. తర్వాత మూవీని బోయపాటితో చేయబోతున్న విషయం తెలిసిందే.

బెల్లంకొండ- బోయపాటి కాంబినేషన్ లో మొదలుకానున్న మూవీ కోసం రకుల్ ప్రీత్ సింగ్ ని హీరోయిన్ గా తీసుకునేందుకు బెల్లంకొండ సురేష్ పావులు కదుపుతున్నాడు. ప్రస్తుతం కోటి వరకూ పుచ్చుకుంటున్న రకుల్ కి 2 కోట్ల ఆఫర్ ఇవ్వడంతో.. ఆమె దాదాపుగా ఓకే చెప్పేసినట్లు తెలుస్తోంది. ఇప్పటివరకూ ఒక్కటంటే ఒకటి కూడా బ్లాక్ బస్టర్ సాధించకుండా.. ఇలా టాప్ స్టార్ హీరోయిన్ల రేంజ్ లో 2 కోట్లు పుచ్చుకోగలగడం.. రకుల్ క్రేజ్ కి అద్దం పడుతోంది. మరి ఎన్టీఆర్ నాన్నకు ప్రేమతో, బన్నీతో చేస్తున్న సరైనోడు సినిమాలు హిట్ కొడితే.. అప్పుడు అమ్మడి రేట్ ఎంత ఉంటుందో ? ఎంత అంటుందో ?