బెల్లం‘కొండ’ తెలివిగా కరిగిస్తున్నాడు

బెల్లంకొండ సురేష్ అనగానే.. ఆయన తీసిన సినిమాల కంటే కూడా.. ఆ పేరుతో ముడిపడ్డ వివాదాలే గుర్తుకొస్తాయి సినీ జనాలకు. తన ప్రతి సినిమాకూ ఏదో ఒక వివాదంలో చిక్కుకోవడం బెల్లంకొండకు అలవాటే. అందులోనూ బెల్లంకొండ బేనర్ నుంచి వచ్చిన చివరి మూడు సినిమాల విషయంలో పెద్ద గొడవలే నడిచాయి. కొడుకు బెల్లంకొండ శ్రీనివాస్ ను హీరోగా పరిచయం చేస్తూ ఆయన తీసిన ‘అల్లుడు శీను’ మామూలుగా చూస్తే మంచి వసూళ్లే సాధించింది కానీ.. పెట్టుబడిలో సగం కూడా రాబట్టలేకపోయింది. మరోవైపు ‘రభస’ పెద్ద డిజాస్టర్ రావడంతో దాని బయ్యర్లు కూడా నిలువునా మునిగారు. ఫైనాన్షియర్లకు కూడా బెల్లంకొండ భారీగానే బకాయి పడ్డాడు. దీంతో ‘గంగ’ సినిమా విడుదల టైంలో పెద్ద గొడవే నడిచింది. ఆ సమయానికి ఎలాగోలా సర్దుబాటు చేసి సినిమాను రిలీజ్ చేయించాడు బెల్లంకొండ.

ఐతే మళ్లీ బెల్లకొండ బేనర్లో సినిమా తీస్తే మాత్రం అది విడుదలవడం అంత సులువు కాదు. బయ్యర్లు - ఫైనాన్షియర్లు అడ్డం పడిపోతారు. అందుకే తెలివిగా తన కొడుకుని వేరే బేనర్లలో నటింపజేస్తూ ఫైనాన్షియల్ బ్యాకప్ ఇస్తూ తనకు, ఆ సినిమాలకు ఏ సంబంధం లేదన్నట్లు వ్యవహరిస్తున్నాడు బెల్లంకొండ. అప్పుడెప్పుడో ‘నీ తోడు కావాలి’ అనే సినిమాను నిర్మించి చేతులు కాల్చుకున్న భీమనేని శ్రీనివాసరావు మళ్లీ ఇప్పుడు శ్రీనివాస్ ను హీరోగా పెట్టి సినిమా నిర్మించేంత అవసరం ఉందా? అది కూడా భారీ బడ్జెట్ పెట్టి సినిమా తీసేంత సీన్ ఉందా? ఈ సినిమాకు బెల్లంకొండ బ్యాకప్ ఉందనడంలో సందేహమే అక్కర్లేదు. ఇక బోయపాటి శ్రీనుతో బెల్లంకొండ శ్రీనివాస్ చేయబోయే సినిమా విషయంలోనూ తెర వెనుక ఉన్నది బెల్లంకొండే అని సమాచారం. తొలిసారి సినీ నిర్మాణంలోకి అడుగు పెడుతున్న అభిషేక్ పిక్చర్స్ కు బెల్లంకొండ శ్రీనివాస్ తప్ప వేరే హీరోనే దొరకలేదా? అది కూడా భారీ బడ్జెట్ సినిమానే అంటున్నారు. ఈ సినిమాకు కూడా బ్యాకప్ బెల్లంకొండే అన్నది బహిరంగ రహస్యం. ఈ సంగతి బెల్లంకొండతో వివాదాలున్న ఫైనాన్షియర్లు - బయ్యర్లకు కూడా తెలుసు. కానీ పేరు అతడిది కాదు కదా.