మాస్ రాజా వస్తున్నాడు కాస్కోండి

ఇది పక్కా నాన్ వెజ్ సినిమా.. ‘బెంగాల్ టైగర్’ గురించి మాస్ రాజా రవితేజ చేసిన కామెంట్ ఇది. కానీ జనాలు నిష్టగా గౌరీ పూజ చేసుకునే దీపావళి పండక్కి ఈ నాన్ వెజ్ సినిమా థియేటర్లలోకి దిగబోతోంది. దీపావళికి ఐదు రోజుల ముందు, అంటే నవంబరు 5న ‘బెంగాల్ టైగర్’ విడుదల కాబోతోంది. నిర్మాత కె.కె.రాధామోహన్ ఈ మేరకు ప్రెస్ నోట్ రిలీజ్ చేశాడు.

‘రచ్చ’ తర్వాత సంపత్ నంది దర్శకత్వం వహిస్తున్న సినిమా ఇది. రెండేళ్ల పాటు ‘గబ్బర్ సింగ్-2’ కోసం కష్టపడి, చివరికి ఆ ప్రాజెక్టు నుంచి బయటికి వచ్చేసిన సంపత్.. ఎంతో కసిగా తీసిన సినిమా ఇది. మాస్ రాజా ఇమేజ్ కు తగ్గట్లు పక్కా మాస్ మసాలా సినిమా తీసినట్లు చెబుతున్నారు. ‘రచ్చ’ సినిమాతోనే తాను మంచి కమర్షియల్ డైరెక్టర్ అని చాటుకున్నాడు సంపత్.

ఐతే దీపావళికి ఆల్రెడీ వరుణ్ తేజ్-క్రిష్ ల ‘కంచె’ షెడ్యూలై ఉంది. ఆ సినిమా నవంబరు 6న విడుదల కావాల్సి ఉంది. నాగచైతన్య సినిమా ‘సాహసం శ్వాసగా’ కూడా దీపావళికే రిలీజ్ అంటున్నారు. మరి మాస్ రాజా సినిమాతో ఆ రెండు సినిమాలకూ ఇబ్బందే. ఎందుకంటే మాస్ జనాలందరినీ తన సినిమా వైపు లాగేస్తాడు రవితేజ. కాబట్టి బాక్సాఫీస్ సమరం రసవత్తరంగానే ఉంటుందన్నమాట.