రాజా అన్నీ కలిపి కొట్టాడు

వచ్చేసిందండీ ‘బెంగాల్ టైగర్’ కొత్త ట్రైలర్. రవితేజ మళ్లీ పాత రోజులకు వెళ్లిపోయినట్లున్నాడు. ఒకప్పుడు వరుసగా ‘అల్లరి’ సినిమాలు చేసి.. ఓ దశలో మరీ ఆ అల్లరి ఎక్కువైపోయి సినిమాలు బోల్తా కొట్టేయడంతో బలుపు - పవర్ లాంటి కొంచెం సీరియస్ టచ్ ఉన్న సినిమాలు చేసిన రవితేజ.. ఇప్పుడు మళ్లీ పాత స్టయిల్లోనే సినిమా చేసినట్లు తెలిసిపోతోంది ‘బెంగాల్ టైగర్’ సినిమా చూస్తుంటే. మొత్తం రవితేజ తిక్క హీరోయిజం మీద.. అతడి అల్లరి మీదే సినిమా నడుస్తుందని అర్థమవుతోంది.

ఫేమస్ కావడం కోసం ఏదైనా చేసే.. ఎవర్నీ లెక్కచేయని పాత్రలో నటిస్తున్నాడిందులో మాస్ రాజా. నువ్వు ఫేమస్ అవడం కోసం ఏమైనా చేస్తావా అని షాయాజి షిండే అడుగుతుంటే.. ‘కిక్కు కోసం నువ్వు ఏమైనా చేస్తావా’ అన్న డైలాగ్ కొడుతోంది. ఇక కమెడియన్లతో కలిసి రవితేజ చేస్తున్న అల్లరి చూస్తుంటే ‘దరువు’ సినిమా కొడుతోంది. అక్కడక్కడా ‘డాన్ శీను’ ఛాయలు కూడా కనిపిస్తున్నాయి. పృథ్వీ - బ్రహ్మి - పోసాని పాత్రలతో బాగానే వినోదం పండించే ప్రయత్నం చేశాడు సంపత్ నంది. ట్రైలర్ మధ్యలో రవితేజ ‘‘నేను సపోర్ట్ తో పైకొచ్చినవాణ్ని కాదు.. సోలోగా పైకొచ్చిన వాణ్ని’’ అంటూ తన గురించి తానే ఓ డైలాగ్ వేసుకోవడం విశేషం. తమన్నా - రాశి ఖన్నా గ్లామర్ డోస్ బాగానే ఇచ్చినట్లున్నారు. కందిరీగ సినిమా తరహాలో అక్ష కూడా ఓ పాత్ర చేసినట్లుగా కనిపిస్తోంది. ‘‘వాడు టైగర్ బెంగాల్ టైగర్.. అది జాతీయ జంతువు, వీడు జాతి జంతువు’’.. ‘‘నన్ను చంపే కత్తి కానీ, గన్ను కానీ తయారవ్వలేదు, మేక్ యాన్ ఆర్డర్’’.. ఇలాంటి పవర్ ఫుల్ డైలాగులతో ట్రైలర్ ముగించారు. దీపావళి కానుకగా నవంబరు 5న ఈ సినిమా ప్రేక్షకుల ముందుకొస్తున్న సంగతి తెలిసిందే.