హిట్ టాక్.. స్క్రీన్లు పెంచేశారు

ఈ వారం రెండు రోజుల వ్యవధిలో నాలుగు సినిమాలు థియేటర్లలోకి దిగాయి. ఐతే ఈ నాలుగింట్లో సౌఖ్యం, మామ మంచు అల్లుడు కంచు సినిమాలకు థియేటర్లు బాగా దొరగ్గా.. భలే మంచి రోజు - జత కలిసే పెద్దగా థియేటర్లు దక్కించుకోలేకపోయాయి. ఐతే ఆశ్చర్యకరమైన విషయం ఏంటంటే థియేటర్లు తక్కువగా లభించిన ఈ రెండు సినిమాలకే మంచి టాక్ రావడం. సౌఖ్యం - మామ మంచు అల్లుడు కంచు.. ఈ రెండూ నెగెటివ్ టాక్ తోనే నడుస్తున్నాయి. ఐతే తర్వాతి వారం రెండు మూడు సినిమాలు థియేటర్లలోకి దిగుతున్న నేపథ్యంలో ఈ వీకెండ్ అన్నది ఈ సినిమాలకు కీలకం. టాక్ బాగున్న నేపథ్యంలో థియేటర్లు పెంచడం అటు బయ్యర్లకు, ఇటు ఎగ్జిబిటర్లకు అవసరం.

‘భలే మంచి రోజు’ సినిమాకు అన్ని వైపుల నుంచి ఫుల్ పాజిటివ్ టాక్ రావడంతో తొలి రోజు సాయంత్రానికే షోలు, స్క్రీన్లు పెరిగాయి. తొలి రోజు అదనపు షోలు వేశారు. స్క్రీన్లు కూడా యాడ్ అయ్యాయి. ఇక శని, ఆది వారాల్లో ‘సౌఖ్యం’ సినిమాను పక్కనబెట్టి మరీ.. ‘భలే మంచి రోజు’ను ఆడించడానికి సన్నాహాలు చేస్తున్నారు. మరోవైపు ‘జత కలిసే’కు కూడా స్క్రీన్లు పెంచాలన్న ఒత్తిడి వస్తోంది. ఈ సినిమాకు హైదరాబాద్ లాంటి పెద్ద నగరాల్లోనూ చెప్పుకోదగ్గ సంఖ్యలో థియేటర్లు ఇవ్వలేదు. వీకెండ్ అయ్యాక దీనికి.. ‘భలే మంచి రోజు’కు ఎక్కువ స్క్రీన్లు దక్కే అవకాశముంది.