భీమ్లా నాయక్ టీజర్ వచ్చేది అప్పుడేనా?

పవన్ కళ్యాణ్ హీరోగా రూపొందుతున్న భీమ్లా నాయక్‌ సినిమా సంక్రాంతికి రావడం ఖాయం అంటూ మేకర్స్ పదే పదే చెబుతూ వస్తున్నారు. మలయాళ హిట్ సినిమా అయ్యప్పనుమ్‌ కోషియుమ్‌ కు భీమ్లా నాయక్ రీమేక్ అనే విషయం తెల్సిందే. తెలుగు లో వర్షన్ కు పలు మార్పులు చేర్పులు చేసి పవన్‌ ఇమేజ్ కు తగ్గట్లుగా తెరకెక్కించారు. సాగర్‌ చంద్ర దర్శకత్వం వహిస్తుండగా త్రివిక్రమ్ ఈ సినిమాకు రచన సహకారం అందించాడు. భారీ అంచనాలున్న ఈ సినిమా నుండి ఇప్పటికే పవన్ కళ్యాణ్ పోస్టర్‌ మరియు రానా లుక్‌ రివీల్‌ చేశారు. సినిమాపై మరింతగా అంచనాలు పెంచేలా సినిమా టీజర్‌ ను కూడా విడుదల చేయబోతున్నట్లుగా సమాచారం అందుతోంది.

భీమ్లా నాయక్‌ టీజర్‌ ను డిసెంబర్ 15వ తారీకున విడుదల చేసేందుకు ఏర్పాట్లు చేస్తున్నట్లుగా తెలుస్తోంది. పవన్‌ కళ్యాణ్‌ మాస్ లుక్ మరియు డైలాగ్స్ ఇప్పటికే గ్లిమ్స్ రూపంలో వచ్చాయి. భీమ్లా నాయక్ గా పవన్ కళ్యాణ్‌ ను వెండి తెరపై ఎప్పుడెప్పుడు చూస్తామా అంటూ అంతా ఆసక్తిగా ఎదురు చూస్తున్న సమయంలో సంక్రాంతికి విడుదల ఖాయం అంటూ మరోసారి క్లారిటీ ఇస్తూ టీజర్ ను విడుదల చేయబోతున్నారు. టీజర్‌ లో కూడా విడుదల తేదీని అధికారికంగా ప్రకటించే అవకాశం ఉంది. సంక్రాంతికి ఆర్ ఆర్ ఆర్‌ మరియు రాధే శ్యామ్‌ సినిమాలు రాబోతున్నాయి. దాంతో భీమ్లా నాయక్ ను వాయిదా వేసేలా కొందరు నిర్మాతలు చర్చలు జరిపారంటూ వార్తలు వచ్చాయి. కాని భీమ్లా నాయక్ మేకర్స్ మాత్రం విడుదల విషయంలో తగ్గేది లేదంటున్నారు.

నిత్యా మీనన్ ఈ సినిమా లో పవన్ కళ్యాణ్‌ కు జోడీగా నటించింది. ఒక సాదారణ గృహిణి పాత్రలో బిడ్డకు తల్లిగా ఆమె కనిపించబోతుంది. భీమ్లా నాయక్ తో పవన్‌ కళ్యాణ్ అభిమానులకు ఫుల్‌ మీల్స్ ఖాయం అంటూ యూనిట్‌ సభ్యులు నమ్మకంగా చెబుతున్నారు. పవన్ మరియు రానాల కాంబో సన్నివేశాలు అద్బుతంగా ఉంటాయని మేకర్స్‌ చెబుతున్నారు. త్రివిక్రమ్‌ మార్క్‌ స్క్రీన్‌ ప్లేతో పాటు డైలాగ్స్ సినిమా కు ప్రధాన ఆకర్షణగా ఉంటాయని అంటున్నారు. మొత్తానికి భీమ్లా నాయక్ సినిమా ఓ పవర్‌ ప్యాక్‌ మూవీగా మాస్ ఆడియన్స్ తో పాటు అన్ని వర్గాల వారిని ఆకట్టుకునే విధంగా ఉంటుందని అంటున్నారు.