పెద్ద పండక్కే రావాలని ఫిక్స్ అయిన 'భీమ్లా నాయక్'..!

పవన్ కల్యాణ్ - రానా దగ్గుబాటి కలసి నటిస్తున్న మల్టీస్టారర్ మూవీ ''భీమ్లా నాయక్''. ఇందులో పవన్ భార్యగా నిత్యా మీనన్.. రానా సరసన సంయుక్త మీనన్ నటిస్తున్నారు. ఇది మలయాళ బ్లాక్ బస్టర్ 'అయ్యప్పనుమ్ కొశీయుమ్' చిత్రానికి తెలుగు రీమేక్. తెలుగు నేటివిటీకి పవన్ ఇమేజ్ కు తగ్గట్టుగా మార్పులు చేర్పులు చేసి త్రివిక్రమ్ శ్రీనివాస్ ఈ స్క్రిప్ట్ రెడీ చేశారు. సాగర్ కె చంద్ర ఈ చిత్రానికి దర్శకత్వం వహిస్తున్నారు.

'భీమ్లా నాయక్' చిత్రాన్ని 2022 సంక్రాంతి కానుకగా జనవరి 12న విడుదల చేయనున్నట్లు మేకర్స్ ఇప్పటికే ప్రకటించారు. అయితే జనవరి 6వ తేదీన 'ఆర్.ఆర్.ఆర్' చిత్రాన్ని రిలీజ్ చేస్తున్నట్లు అనౌన్స్ చేయడంతో.. పవన్ కళ్యాణ్ చిత్రాన్ని వాయిదా వేస్తారని రూమర్స్ వచ్చాయి. ఈ నేపథ్యంలో తాజాగా చిత్ర బృందం సాంగ్ కు సంబంధించిన అప్డేట్ ఇస్తూ.. ఈ సినిమాని చెప్పిన విధంగానే పండక్కి రిలీజ్ చేస్తున్నట్లు తెలిపారు.

సినిమాలోని సెకండ్ సింగిల్ 'అంత ఇష్టం' సాంగ్ లిరికల్ వీడియోని దసరా కానుకగా అక్టోబర్ 15న విడుదల చేస్తున్నట్లు మేకర్స్ వెల్లడించారు. ఈ సందర్భంగా వదిలిన పోస్టర్ లో పవన్ కళ్యాణ్ - నిత్యా మీనన్ కు సంబంధించిన పోస్టర్ ఆకట్టుకుంటోంది. అయితే ఇందులో 'భీమ్లా నాయక్' 2022 జనవరి 12న థియేటర్లలో రిపోర్ట్ చేయనున్నట్లు పేర్కొన్నారు. దీనిని బట్టి 'RRR' కోసం పవన్ చిత్రాన్ని వాయిదా వేసుకోవడం లేదనేది స్పష్టం అవుతోంది.

కాగా, నిజాయితీ గల పోలీస్ ఆఫీసర్ - రిటైర్డ్ హవల్దార్ మధ్య అహం ఆత్మ గౌరవం వల్ల ఏర్పడిన పరిస్థితులు నేపథ్యంలో 'భీమ్లా నాయక్' సినిమా నడుస్తుంది. ఇందులో పవన్ కళ్యాణ్ - రానా లలో ఎవరి పాత్రకు ఎంత ప్రాధాన్యత ఉందనేది పక్కన పెడితే.. ఇప్పటి వరకు విడుదలైన ఇద్దరు హీరోల గ్లిమ్స్ - ఫస్ట్ సాంగ్ మంచి స్పందన తెచ్చుకున్నాయి. ఈ క్రమంలో పవన్ - నిత్యా మీనన్ ల మీద సాగే 'అంత ఇష్టం' పాటను రిలీజ్ చేయడానికి సన్నాహాలు చేస్తున్నారు.

ఎస్ఎస్ థమన్ ఈ చిత్రానికి సంగీతం సమకూరుస్తున్నారు. రవి కె చంద్రన్ సినిమాటోగ్రఫీ అందించగా.. ఏఎస్ ప్రకాష్ ఆర్ట్ డైరెక్టర్ గా వర్క్ చేస్తున్నారు. నవీన్ నూలి ఎడిటింగ్ బాధ్యతలు స్వీకరించారు. పీడీవీ ప్రసాద్ సమర్పణలో సితార ఎంటర్టైన్మెంట్స్ బ్యానర్ పై సూర్య దేవర నాగవంశీ ప్రతిష్టాత్మకంగా 'భీమ్లా నాయక్' చిత్రాన్ని నిర్మిస్తున్నారు.