చరిత్రను మార్చి రాస్తాడట!

తమిళ స్టార్‌ నటుడు విజయ్ ఆంటోనీ హీరోగా వచ్చిన సినిమా బిచ్చగాడు. తమిళ డబ్బింగ్‌ సినిమా అయినా కూడా బిచ్చగాడు సినిమా తెలుగు లో భారీ విజయాన్ని సొంతం చేసుకుంది. ఆ సినిమా తమిళంలో కూడా విజయ్ ఆంటోనీని స్టార్‌ గా మార్చింది అనడంలో సందేహం లేదు. బిచ్చగాడు సూపర్ హిట్‌ అయిన నేపథ్యంలో ప్రస్తుతం బిచ్చగాడు 2 పేరుతో సీక్వెల్ రూపొందుతోంది.

ఈ సినిమాను విజయ్ ఆంటోనీ ఫిల్మ్ కార్పొరేషన్ బ్యానర్ పై ఫాతిమా విజయ్ ఆంటోనీ నిర్మిస్తున్నారు. ఈ చిత్రంతో విజయ్ ఆంటోనీ దర్శకుడిగా మారాడు. ఆయన దర్శకత్వంతో పాటు సంగీతాన్ని అందిస్తూ ఎడిటింగ్ బాధ్యతలూ కూడా నిర్వహిస్తుండటం విశేషం. కావ్య థాపర్ నాయికగా నటిస్తోంది. తాజాగా బిచ్చగాడు 2 థీమ్ సాంగ్ ను విడుదల చేశారు.

ఆ థీమ్ సాంగ్ ఆద్యంతం ఆసక్తికరంగా సాగుతూ సినిమా కాన్సెప్ట్ ఎలా ఉండబోతోంది అనే హింట్ ఇచ్చింది. ఈ థీమ్ సాంగ్ చూస్తే ...రోల్స్ రాయిస్ కారులో నుంచి స్టార్ హోటల్ దగ్గర దిగిన కథానాయకుడు అక్కడ బిచ్చగాడిలా మేకప్ వేసుకుంటాడు. ఆటోలో బయటకు వెళ్తాడు. అతను వెళ్తున్నది యాంటీ బికిలీ మిషన్ మీద అనేది తర్వాత తెలుస్తుంది.

ఈ మిషన్ ఏంటి అనేది సినిమాలో చూడాలి. చరిత్రను సంపన్నులు రాశారు. పేదల బతుకులు వాళ్లకు తెలియదు. వస్తున్నాడు చరిత్రను మార్చి రాసేందుకు అంటూ యాంటీ బికిలీ లక్ష్యమేంటో థీమ్ సాంగ్ లో చెప్పేశారు. భగవద్గీతలో శ్రీకృష్ణుడు చెప్పిన ధర్మసంస్థాపనార్దయా సంభవామి యుగే యుగే శ్లోకం నేపథ్యంగా వినిపించింది ఆద్యంతం ఆసక్తికరంగా సాగిన బిచ్చగాడు 2 థీమ్ సాంగ్ ఆసక్తిరేపుతోంది.

బిచ్చగాడు తెలుగు లో సూపర్‌ హిట్ అయ్యింది కనుక బిచ్చగాడు 2 కు కూడా భారీ ఎత్తున అంచనాలు ఉన్నాయి. అంచనాలకు తగ్గట్లుగా విజయ్ ఆంటోనీ ఈ సినిమాను తెరకెక్కించి ఉంటాడు అనే నమ్మకం చాలా మందిలో వ్యక్తం అవుతోంది. ప్రస్తుతం సినిమాకు సంబంధించిన హడావుడి కనిపిస్తుంది. త్వరలోనే విడుదల అయ్యే అవకాశాలు ఉన్నాయి.