బిచ్చగాడు బాలీవుడ్ వెళ్తున్నాడు

బిచ్చగాడు.. ఈ టైటిల్ చూసి చాలామంది ఎగతాళిగా మాట్లాడారు. అలాంటి వాళ్ల నోళ్లకు తాళాలు వేస్తూ కలెక్షన్ల ప్రభంజనం సృష్టించిందా సినిమా. ఇప్పటికే ‘బిచ్చగాడు’ కలెక్షన్లు రూ.25 కోట్లను దాటిపోయాయి. ఇంకో రెండో రోజుల్లో శత దినోత్సవం జరుపుకోబోతోందా సినిమా. శత దినోత్సవం అంటే.. ఏదో మొక్కబడిగా ఒకటి రెండు కేంద్రాల్లో కూడా కాదు. చాలా పెద్ద నంబరే ఉండొచ్చని అంటున్నారు. ఆ లెక్కల సంగతి తర్వాత చూద్దాం.

తమిళ.. తెలుగు భాషల్లో సెన్సేషన్ క్రియేట్ చేసిన ‘బిచ్చగాడు’ ఇప్పుడు బాలీవుడ్ కు వెళ్తోంది. ఈ సినిమాను ప్రముఖ నిర్మాణ సంస్థ ఫాక్స్ స్టార్ స్టూడియో హిందీలో పునర్నిర్మించడానికి సన్నాహాలు చేస్తోంది. ఒరిజినల్ కు దర్శకత్వం వహించిన శశినే హిందీలోనూ ఈ చిత్రాన్ని రూపొందిస్తాడు. ఐతే హీరో ఎవరన్నది ఇంకా ఖరారు కాలేదు. కొంతమంది హీరోలతో సంప్రదింపులు జరుపుతున్నారు.

‘బిచ్చగాడు’ చిత్రాన్ని తెలుగులోనూ రీమేక్ చేయడానికి అప్పట్లో ప్రయత్నాలు జరిగాయి. రానా.. సునీల్ లాంటి హీరోలను సంప్రదించినా వాళ్లు ఒప్పుకోలేదు. చివరికి ఛాయిస్ లేక డబ్ చేసి రిలీజ్ చేశారు. సినిమా బ్లాక్ బస్టర్ హిట్టయిపోయింది. ఐతే తెలుగులో ఈ సినిమా సాధించిన విజయాన్ని చూసిన కన్నడ హీరో సుదీప్.. హిందీలో తనే ‘బిచ్చగాడు’ పాత్ర పోషించడానికి రెడీ అవుతున్నాడో. హిందీలో బిచ్చగాడు ఎవరన్నదే తేలాల్సి ఉంది.