బిచ్చగాడు-2 వస్తుంది.. స్టోరీ నల్లధనంపైనే!

ఈమధ్యకాలంలో ఎలాంటి భారీ ప్రమోషన్స్, ఎలాంటి అంచనాలూ లేకుండా విడుదలయ్యి సంచలనాలు సృష్టించిన సినిమా బిచ్చగాడు. కేవలం మౌత్ టాక్ తో ఈమధ్య కాలంలో వందరోజులు పూర్తిచేసుకున్న సినిమా బిచ్చగాడు! దీంతో అటు కోలీవుడ్ - ఇటు టాలీవుడ్ లలో ఈ సినిమా చేసిన హడావిడి చాలామందికి పెద్ద షాకే ఇచ్చింది. ఈ సినిమాకి వచ్చిన కలెక్షన్స్ చూసి బడా నిర్మాతలు సైతం ఆశ్చర్యపోయారనే చెప్పాలి. ఈ మూవీలో హీరోగా చేసిన విజయ్ ఆంటోనీకి మాస్‌ లో విపరీతంగా క్రేజ్ వచ్చేయడంతోపాటు - తెలుగులోనూ డైరెక్ట్ మార్కెట్ ఏర్పడిపోయింది. ఇంతకుముందు తెలుగులో విడుదలయిన విజయ్ "నకిలీ" - "డాక్టర్ సలీమ్" అనే రెండు చిత్రాల్లో నటించినా రాని గుర్తింపు ఒక్క బిచ్చగాడుతో వచ్చింది.

స్వతహాగా సంగీత దర్శకుడు కూడా కావడంతో పాటలు కూడా సూపర్ హిట్ అవ్వడంతో విజయ్ ఆంటోనీకి మంచి పేరొచ్చింది. ఈ క్రమంలో "బిచ్చగాడు"కి సీక్వెల్ ప్లాన్ చేస్తున్నాడట విజయ్ ఆంటోనీ. అయితే ఈ బిచ్చగాడు పార్ట్-2లో నల్లధనం అంశాన్ని టచ్ చేయబోతున్నాడని టాక్! ఇప్పటికే దీనికి సంబంధించిన ప్రీ ప్రొడక్షన్ పనులు వేగంగా జరుగుతున్నాయని తెలుస్తోంది. ప్రస్తుతం దేశంమొత్తం మీద నోట్ల రద్దు అనంతరం నల్లధనంపై విపరీతమైన చర్చ నడుస్తున్న నేపథ్యంలో... ఈ సినిమాలో కథ కాస్త జాగ్రత్తగా చూసుకుంటే... ఇంక అడ్డూండకపోవచ్చు. బిచ్చగాడు ఇచ్చిన నమ్మకంతో దాదాపు 50 కోట్ల బడ్జెట్‌ తో బిచ్చగాడు-2 ని తెరకెక్కించాలని ప్లాన్ చేస్తున్నారట మేకర్స్. ఎలాగూ ఇప్పటికే తెలుగు - తమిళంలో డైరెక్ట్ మార్కెట్ ఉన్న ఈ విజయ్ ఆంటోనీ సినిమాని మలయాళం - కన్నడలోనూ దీన్ని విడుదల చేయాలని స్కెచ్ వేస్తున్నట్లు సమాచారం.

Like Us on Facebook : https://www.facebook.com/Tupakidotcom/