బన్నీ తో పాన్ ఇండియా సబ్జెక్ట్ ని హ్యాండిల్ చేయగలడా..?

స్టైలిష్ స్టార్ అల్లు అర్జున్ ప్రస్తుతం సుకుమార్ దర్శకత్వంలో 'పుష్ప' అనే యాక్షన్ ఎంటర్టైనర్ లో నటిస్తున్నాడు. ఇది పాన్ ఇండియా మూవీగా తెలుగు తమిళ కన్నడ మలయాళ హిందీ భాషల్లో విడుదల కానుంది. టాలీవుడ్ స్టార్ హీరోలందరూ పాన్ ఇండియా స్థాయిలో క్రేజ్ తెచ్చుకుంటున్న తరుణంలో.. బన్నీ ఈ సినిమాతో మార్కెట్ విస్తరించుకోవాలని ప్లాన్ చేసుకున్నాడు. బన్నీ సినిమాల ఎంపిక కూడా ఇకపై అలానే ఉండబోతోంది. ఈ క్రమంలో ఇప్పటికే కొరటాల శివ దర్శకత్వంలో ఓ సినిమా ప్రకటించేశాడు. ఈ నేపథ్యంలో తాజాగా బ్లాక్ బస్టర్ డైరెక్టర్ అనిల్ రావిపూడి తో అల్లు అర్జున్ ఓ సినిమా చేయనున్నాడనే వార్తలు వస్తున్నాయి.

ఎంటర్టైన్మెంట్ కి తనదైన శైలిలో కమర్షియల్ హంగులు జోడించి వరుస హిట్స్ అందుకుంటున్న డైరెక్టర్ అనీల్ రావిపూడి. గతేడాది 'సరిలేరు నీకెవ్వరు' సినిమాతో బ్లాక్ బస్టర్ హిట్ అందుకున్న అనీల్.. ప్రస్తుతం 'ఎఫ్ 3' సినిమా చేస్తున్నాడు. ఈ క్రమంలో అల్లు అర్జున్ - అనిల్ రావిపూడి కలయికలో ఓ సినిమా రానుందని అంటున్నారు. ఇప్పటికే వీరిద్దరూ కథ విషయమై సంప్రదింపులు కూడా జరిపారని.. దీనికి బన్నీ సైడ్ నుంచి గ్రీన్ సిగ్నల్ కూడా వచ్చిందని టాక్ నడుస్తోంది. అయితే బన్నీ పాన్ ఇండియా స్టార్ ఇమేజ్ అందుకునేలా సినిమాలు సెలెక్ట్ చేసుకుంటున్నాడు. మరి ఈ వార్తలు కనుక నిజమైతే అనీల్ రావిపూడితో చేసే సినిమా కూడా అదే కోవలో ఉంటుంది. ఈ నేపథ్యంలో అనిల్ పాన్ ఇండియా సబ్జెక్ట్ ని హ్యాండిల్ చేయగలడా అనే కామెంట్స్ వినిపిస్తున్నాయి. మరి ఈ ప్రాజెక్ట్ పై నిజానిజాలు తెలియాలంటే ఇంకొన్నాళ్లు వేచి చూడాల్సిందే.