సీరియల్ నటి షేర్ చేసిన ఫొటోలో కనిపించేది 'బిగ్ బాస్ 5' సెట్ అనుకోవచ్చా..?

'బిగ్ బాస్' రియాలిటీ షో తెలుగు బుల్లితెర ప్రేక్షకులను ఎంతగా అలరించిందో ప్రత్యేకంగా చెప్పక్కర్లేదు. హిందీతో పాటుగా అన్ని ప్రధాన భారతీయ భాషల్లోనూ పాపులర్ అయిన ఈ షో.. తెలుగులోకి కాస్త ఆలస్యంగా పరిచయమైంది. అయినప్పటికీ 'స్టార్ మా' లో ప్రసారమై, ఇక్కడ కూడా సూపర్ రెస్పాన్స్ తెచ్చుకుంది. ఇప్పటికే సక్సెస్ ఫుల్ గా నాలుగు సీజన్లు పూర్తి చేసుకుంది. టీఆర్పీలో ఇండియన్ టెలివిజన్ రికార్డులను తిరగరాసిన 'తెలుగు బిగ్ బాస్'.. ఇప్పుడు ఐదో సీజన్ కోసం రెడీ అవుతోంది.

కరోనా నేపథ్యంలో 'బిగ్ బాస్ 4' కాస్త లేట్ గా ప్రారంభమైంది. మూడున్నర నెలల పాటు సాగిన ఈ షో.. పాండమిక్ టైం లో ఇంటికే పరిమితమైన జనాలకు ఎంటర్టైన్మెంట్ అందించింది. ఈ క్రమంలో 'బిగ్ బాస్ 5' ని ముందుగానే స్టార్ట్ చేయాలని ప్లాన్ చేసుకున్నారు నిర్వాహకులు. అయితే ఈసారి కరోనా సెకండ్ వేవ్ వచ్చి మళ్ళీ గతేడాది పరిస్థితులను పునరావృతం చేసింది. దీంతో ఒకానొక దశలో ఈ ఏడాది సీజన్ ఉండకపోవచ్చని వార్తలు కూడా వచ్చాయి. ఈ నేపథ్యంలో బిగ్ బాస్ ఐదో సీజన్ ఎట్టి పరిస్థితుల్లో ఉంటుందని క్లారిటీ వచ్చేసింది.

కోవిడ్ సెకండ్ వేవ్ వల్ల ప్లాన్స్ అన్నీ తారుమారైనప్పటికీ.. మళ్లీ 'బిగ్ బాస్ 5' షో పనులు మొదలయ్యాయని తెలుస్తోంది. సెట్ నిర్మాణం చేపట్టడంతో పాటుగా కంటెస్టెంట్స్ ని ఎంపిక చేసే ప్రక్రియ కూడా కొనసాగుతోందని సమాచారం. ఇప్పటికే కొంతమంది సెలబ్రిటీలను షార్ట్ లిస్ట్ చేశారని.. వీరికి జూమ్ కాల్ ద్వారా ఇంటర్వ్యూలు జరుపుతున్నారని టాక్ నడుస్తోంది. అంతేకాదు సెప్టెంబర్ ఫస్ట్ వీక్ నుంచి 'బిగ్ బాస్ 5' నుంచి ప్రారంభం కానుందని.. ఆగస్టు మొదటి వారంలో లోగో ను ఆవిష్కరిస్తారని.. అలాగే ఆగస్టు 29న ప్రోమో విడుదల చేసే అవకాశం ఉందని వార్తలు వినిపిస్తున్నాయి.

ఇదిలా ఉంటే గత కొన్ని రోజులుగా బిగ్ బాస్ ఐదో సీజన్‌ కు సంబంధించిన ఏదో ఒక విషయం సోషల్ మీడియాలో వైరల్ అవుతూనే ఉంది. హోస్ట్ గురించి.. కంటెస్టెంట్స్ గురించి అనేక రూమర్స్ వస్తూనే ఉన్నాయి. 'బిగ్ బాస్ 5' స్టార్ట్ అయ్యేందుకు ఇంకా ఎంతో సమయం ఉండగా.. అప్పుడే లీకులు ఊపందుకున్నట్లు తెలుస్తోంది. పాపులర్ సీరియల్ నటి నవ్య స్వామి, మాజీ కంటెస్టెంట్ అయిన రవికృష్ణతో దిగిన ఫొటో ఇప్పుడు బిగ్ బాస్ లీకుల గురించి చర్చించుకునేలా చేసింది.

తాజాగా నవ్య స్వామి సోషల్ మీడియాలో షేర్ చేసినట్లు చెబుతోన్న ఈ ఫొటోలో ఆమెతో పాటుగా 'బిగ్ బాస్ 4' కంటెస్టెంట్ రవి కృష్ణ ఉన్నారు. వీరి పక్కనే మరొకరు నిలబడి ఉన్నారు. అయితే ఈ ఫోటో బ్యాగ్రౌండ్‌ లో 'బిగ్ బాస్' హౌస్ సెట్ కనిపిస్తోంది. కొందరు వర్కర్లు పని చేస్తున్న దృశ్యాలు కూడా అందులో కనిపిస్తున్నాయి. దీంతో అది 'బిగ్ బాస్' ఐదో సీజన్ కోసం వేస్తున్న సెట్ అని కామెంట్స్ వస్తున్నాయి. అలానే రవి కృష్ణ సపోర్ట్ తో నవ్య స్వామి హౌస్ లో అడుగుపెడుతుందేమో అనే సందేహాలు వ్యక్తం అవుతున్నాయి.

అసలు అది లేటెస్టు ఫోటోనా? లేదా లాస్ట్ సీజన్ అప్పుడు తీసుకున్నదా? అనేది క్లారిటీ లేదు. కాకపోతే తెలుగు 'బిగ్ బాస్ 5' గురించి తెలుసుకోవాలని ఎంతో ఆసక్తిగా ఎదురు చూస్తున్న వాళ్ళు మాత్రం ఈ ఫోటోని సోషల్ మీడియాలో వైరల్ చేసేస్తున్నారు. దీనిపై స్పష్టత రావాలంటే 'బిగ్ బాస్ 5' కు సంబంధించిన అధికారిక ప్రకటన మరియు లోగో వచ్చే వరకు ఆగాల్సిందే.