ఆగస్టు 22న వచ్చేస్తున్న బిగ్ బాస్.. కంటెస్టెంట్లకు కరోనా పరీక్షలు పూర్తి

మాటీవీలో బిగ్ బాస్ సీజన్ -4 ఆగస్టు 22న ప్రారంభం కానుంది. దీని కోసం నిర్వాహకులు అంతా సిద్ధం చేశారు. కరోనా కారణంగా అసలు బిగ్ బాస్ సీజన్ ఈ ఏడాది ఉంటుందా లేదా అనే సందేహాలు తలెత్తాయి. హౌస్ లో కంటెస్టెంట్లు సుమారు 100 రోజులపాటు ఉండాల్సి ఉండడంతో కరోనా వ్యాపించే అవకాశాలు ఉన్నాయని..షో ను వాయిదా వేస్తూ వచ్చారు. అయితే కరోనా తీవ్రత ఎంతకూ తగ్గకపోవడంతో నిర్వాహకులు తగు జాగ్రత్తలు తీసుకొని షోని ప్రారంభించాలని నిర్ణయించారు. ముందుగా షో లో పాటిస్పేట్ చేసే కంటెస్టెంట్లు ఎంపిక ప్రక్రియ పూర్తి చేశారు.

వారందరికీ ముందుగానే కరోనా పరీక్షలు నిర్వహించి నెగిటివ్ వచ్చిన వాళ్ళను మాత్రమే హౌస్ లోకి పంపాలని నిర్ణయించుకున్నారు. ఇటీవల బిగ్ బాస్ కు ఎంపికయిన 16 మంది కంటెస్టెంట్లకు పరీక్షలు చేయగా, అందరికీ నెగిటివ్ వచ్చింది. వీరిని మళ్ళీ 14 రోజుల పాటు పరిశీలించి ఎటువంటి లక్షణాలు కనిపించని వారిని హౌస్ లోకి పంపనున్నారు. ఈ దఫా అక్కినేని నాగార్జున హోస్ట్ గా వ్యవహరించనున్నారు. ఇటీవల విడుదల చేసిన బిగ్ బాస్ సీజన్ -4 టీజర్ లో నాగార్జున ఓల్డ్ గెటప్ లో కనిపించి ఆకట్టుకున్నారు. బిగ్ బాస్ సీజన్ -4 లో పాటిస్పేట్ చేసే వారిని ఫైనలైజ్ చేయగా.. అందులో సింగర్ సునీత, హంసానందిని, శ్రద్ధాదాస్, ఫోక్ సింగర్ మంగ్లీ, జబర్దస్త్ కమెడియన్లు ఆటో ప్రసాద్, పొట్టి నరేష్, నటుడు నందు, వైవా హర్ష, అఖిల్ సర్ధాక్, యామిని భాస్కర్, యూట్యూబర్లు మహాతల్లి, మెహబూబా దిల్ సే, అపూర్వ, సింగర్ నోయెల్, ప్రియ వడ్లమని ఉన్నారు.