బిగ్‌ బాస్ విన్నర్‌ 'సన్నాఫ్‌ ఇండియా' కాంబో!

తెలుగు బిగ్‌ బాస్ విన్నర్‌ వీజే సన్నీ బుల్లి తెర నుండి వెండి తెరకు షిఫ్ట్‌ అవుతున్నాడు. బిగ్‌ బాస్ లోకి వెళ్లక ముందే ఒకటి రెండు చిన్నా చితక సినిమాలను చేసినా కూడా అవి అసలు విడుదల అయ్యిందే లేదు. బిగ్‌ బాస్ ద్వారా సూపర్‌ క్రేజ్ ను దక్కించుకున్న వీజే సన్నీ హీరోగా సక్సెస్ అయ్యేందుకు ప్రయత్నాలు చేస్తున్నాడు. ఆ క్రేజ్‌ ను మరియు స్టార్‌ డమ్‌ ను వీజే సన్నీ సినిమాల్లో సత్తా చాటడానికి ఉపయోగించుకోబోతున్నాడు.

తాజాగా వీజే సన్నీ హీరోగా అన్‌ స్టాపబుల్‌ అనే సినిమా ప్రారంభం అయ్యింది. ఈ సినిమా కు మోహన్‌ బాబు తో సన్నాఫ్ ఇండియా సినిమాను తెరకెక్కించిన డైమండ్ రత్నబాబు దర్శకత్వం వహిస్తున్నాడు. తాజాగా సినిమా షూటింగ్ పూజా కార్యక్రమాలు లాంచనంగా జరిగాయి. టాలీవుడ్‌ జక్కన్న రాజమౌళి తండ్రి విజయేంద్ర ప్రసాద్‌ ఈ సినిమా పూజా కార్యక్రమాల్లో పాల్గొని చిత్ర యూనిట్‌ సభ్యులకు ఆల్‌ ది బెస్ట్‌ చెప్పాడు.

సన్నాఫ్ ఇండియా సినిమా మరీ దారుణమైన పరాజయం పాలయ్యింది. దాంతో డైమండ్ రత్నబాబు కు మళ్లీ అవకాశం వస్తుందా అనే అనుమానాలు వ్యక్తం అయ్యాయి. కాని సన్నాఫ్ ఇండియా సినిమా ఫలితం తో సంబంధం లేకుండా ఆయనపై నమ్మకంతో.. ఆయనతో వర్క్ చేయాలనే ఇంట్రెస్ట్‌ తో సన్నీ ఈ సినిమాను చేసేందుకు సిద్ధం అయినట్లుగా తెలుస్తోంది.

ఈ సినిమాలో సప్తగిరి మరియు బితిరి సత్తి అలియాస్ చేవెళ్ల రవి కీలక పాత్రల్లో కనిపించబోతున్నారు. హీరోయిన్‌ గా ఢీ డాన్సర్ అక్సా ఖాన్ నటించబోతున్నట్లుగా యూనిట్‌ సభ్యులు అధికారికంగా ప్రకటించారు. బాలకృష్ణ ఆహా ఓటీటీ లో చేసిన అన్ స్టాపబుల్‌ షో ఎంతటి విజయాన్ని సొంతం చేసుకుందో అందరికి తెల్సిందే. ఇప్పుడు అదే టైటిల్‌ తో సన్నీ సినిమా రానుండటంతో ముందుగానే జనాల దృష్టిని ఆకర్షిస్తున్నారు.

అన్‌ స్టాపబుల్‌ టైటిల్‌ కు నో డౌట్‌ 100 % ఎంటర్‌ టైన్‌మెంట్‌ అంటూ ట్యాగ్‌ ఇచ్చారు. సన్నీ గెటప్‌ మరియు కథ నేపథ్యం తప్పకుండా సినిమాను ప్రేక్షకులకు చేరువ చేస్తుందనే నమ్మకంను యూనిట్‌ సభ్యులు వ్యక్తం చేస్తున్నారు. తెలగు బిగ్‌ బాస్ విన్నర్ గా నిలిచిన వారు ఎవరు కూడా కెరీర్‌ లో స్ట్రాంగ్ గా నిలదొక్కుకున్నది లేదు. ఇప్పుడు సన్నీ హీరోగా ప్రయత్నాలు చేస్తున్నాడు. మరి ఈయనకు అయినా సక్సెస్ లు వరించేనా చూడాలి.