రిలీజ్ పోస్టర్ వదిలిన 'బిగ్ బుల్' బృందం..!

బాలీవుడ్ స్టార్ అభిషేక్ బచ్చన్ నుండి రాబోతున్న కొత్త సినిమా 'ది బిగ్ బుల్'. ఎంతో ఆసక్తిగా ఎదురుచూస్తున్న ఈ చిత్రం ఎట్టకేలకు ఏప్రిల్ 8న డిస్నీ ప్లస్ హాట్‌స్టార్‌లో విడుదలవుతోంది. ఈ సినిమా విడుదల తేదీని ఇటీవలే టీజర్ తో పాటు రిలీజ్ చేశారు మేకర్స్. ఈ సినిమా కథ 1980-90 మధ్యకాలంలో స్టాక్ బ్రోకర్ హర్షద్ మెహతా చేసినటువంటి భారీ స్టాక్ మార్కెట్ కుంభకోణం ఆధారంగా సాగనుంది. ఈ చిత్రంలో అభిషేక్ ప్రధానపాత్రలో నటిస్తుండగా.. స్టార్ హీరో అజయ్ దేవ్‌గన్ ఈ సినిమాను నిర్మించాడు. అయితే నిజానికి హర్షద్ మెహతాను ముంబై దలాల్ స్ట్రీట్ 'బిగ్ బుల్' అని పిలుస్తారట. ఇటీవలే రిలీజ్ చేసిన బిగ్ బుల్ టీజర్ ద్వారా అభిషేక్ బచ్చన్ క్యారెక్టర్ ఎలా ఉండబోతుందో పరిచయం చేశారు.

హర్షద్ మెహతా పేరు బదులుగా హేమంత్ షా అనే పేరును ప్రధానపాత్రకు సెట్ చేశారు. అయితే ఇక్కడ ఆసక్తికరమైన విషయం ఏమిటంటే.. డైరెక్టర్ హన్సల్ మెహతా ఇదే కథపై 'స్కామ్ 1992' అనే వెబ్ సిరీస్‌ను రూపొందించాడు. అందులో ప్రతీక్ గాంధీ ప్రధానపాత్రలో నటించాడు. స్కామ్ 1992 వెబ్ సిరీస్ అటు ప్రేక్షకుల నుండి ఇటు విమర్శకుల నుండి అద్భుతమైన స్పందనతో పాటు ప్రశంసలను అందుకుంది. ఇదిలా ఉండగా.. కూకీ గులాటి దర్శకత్వం వహించిన 'ది బిగ్ బుల్' మూవీ ఇదివరకే 2020 అక్టోబర్ 23న థియేటర్లలో విడుదల కావాల్సింది. కానీ మహమ్మారి కారణంగా ఈ చిత్రం వాయిదా పడింది. తర్వాత డిస్నీ ప్లస్ హాట్‌స్టార్‌లో డిజిటల్‌ విడుదల చేస్తామని మేకర్స్ ప్రకటించారు. ఈ సినిమాలో ఇలియానా, నికితా దత్తా, సోహుమ్ షా ముఖ్యమైన పాత్రల్లో నటించారు. అయితే తాజాగా ది బిగ్ బుల్ రిలీజ్ పోస్టర్ విడుదల చేశారు మేకర్స్.