పాన్ వరల్డ్ 'ప్రాజెక్ట్ K' సెట్ లో బిగ్గెస్ట్ సూపర్ స్టార్స్..!

యంగ్ రెబల్ స్టార్ ప్రభాస్ - బాలీవుడ్ బ్యూటీ దీపికా పదుకొనే హీరోహీరోయిన్లుగా ఓ భారీ ప్రాజెక్ట్ తెరకెక్కుతున్న సంగతి తెలిసిందే. 'మహానటి' ఫేమ్ నాగ్ అశ్విన్ ''ప్రాజెక్ట్ K'' అనే వర్కింగ్ టైటిల్ తో ఇప్పటికే ఈ చిత్రాన్ని సెట్స్ మీదకు తీసుకెళ్లారు. బాలీవుడ్ సూపర్ స్టార్ అమితాబ్ బచ్చన్ పాల్గొన్న పది రోజుల షూటింగ్ లో కీలకమైన సన్నివేశాలను పూర్తి చేశారు. ఈ క్రమంలో మేకర్స్ తదుపరి షెడ్యూల్ ను మొదలు పెట్టేసారు.

'ప్రాజెక్ట్ K' షూటింగ్ ప్రస్తుతం హైదరాబాద్ లోని వేసిన భారీ సెట్‌ లో జరుగుతోంది. ఇటీవలే దీపికా పదుకునే షూటింగ్ లో పాల్గొనగా.. లేటెస్టుగా డార్లింగ్ కూడా టీమ్ తో జాయిన్ అయ్యారు. శనివారం ప్రభాస్ - దీపికా లపై సన్నివేశాలను చిత్రీకరించారు. దీనికి సంబంధించిన అప్డేట్ ను చిత్ర నిర్మాతలు తాజాగా సోషల్ మీడియా వేదికగా వెల్లడించారు. ఈ సందర్భంగా హీరోహీరోయిన్ల ఫస్ట్ షార్ట్ వీడియోని షేర్ చేశారు.

ఇందులో దర్శకుడు నాగ్ అశ్విన్ రోల్‌ కెమెరా.. స్టార్ట్ అనగానే.. ప్రభాస్ - దీపికా పదుకునే ఫేసులు కనిపించకుండా ఒకరి చేతులు మరొకరు పట్టుకోవడం కనిపిస్తోంది. 'ఇండియాలోని బిగ్గెస్ట్ సూపర్ స్టార్స్ ప్రభాస్ - దీపికా పదుకునే ప్రపంచంలోనే అతిపెద్ద కెమెరాతో చేతులు కలిపారు' అని 'ప్రాజెక్ట్ కె' మేకర్స్ పేర్కొన్నారు.

ఈ సినిమా కోసం ప్రపంచంలోనే లేటెస్ట్ టెక్నాలజీతో రెడీ అయిన అతిపెద్ద కెమెరా అర్రీ అలెక్సా-65 ని ఉపయోగిస్తున్నట్లు తెలుస్తోంది. ఇది సైన్స్ ఫిక్షన్ - సోషియో ఫాంటసీ జోనర్ లో తెరకెక్కుతున్న సూపర్ హీరో మూవీ అని తెలుస్తోంది. భారీ బడ్జెట్ తో హై టెక్నికల్ వాల్యూస్ తో విజువల్ వండర్ తీర్చిదిద్దనున్నారు. దీనికి తగ్గట్టుగానే భారీ కాన్వాస్ ని ఆవిష్కరించే కెమెరాను ఉపయోగిస్తారు.

'ప్రాజెక్ట్ K' చిత్రాన్ని వైజయంతీ మూవీస్ బ్యానర్ పై అశ్వినీ దత్ ప్రతిష్టాత్మకంగా నిర్మిస్తున్నారు. మిక్కీ జె. మేయర్ సంగీతం సమకూరుస్తున్నారు. డానీ శాంచెజ్-లోపెజ్ సినిమాటోగ్రఫీ అందిస్తున్నారు. పాన్ వరల్డ్ స్థాయిలో ఇండియన్ లాంగ్వేజెస్ తో పాటుగా పలు విదేశీ భాషల్లోనూ ఈ చిత్రాన్ని విడుదల చేయనున్నారు.