అఖండతో రాబోతున్న బింబిసారా

నందమూరి కళ్యాణ్ రామ్‌ కమర్షియల్‌ హిట్స్ పెద్దగా రాకపోయినా కూడా మంచి కథలను ఎంపిక చేసుకుంటూ ప్రయోగాలను చేస్తూ వస్తున్నాడు. సినిమా కమర్షియల్ ఫలితాల గురించి ఆలోచించకుండా సొంతంగా సినిమాలు చేస్తున్న కళ్యాణ్ రామ్ ఈ సారి చాలా ప్రతిష్టాత్మకంగా తీసుకుని చేసిన సినిమా బింబిసారా. ఈ సినిమా చిత్రీకరణ ప్రారంభం అయిన సమయంలోనే ఆసక్తికలిగించేలా పోస్టర్ లను విడుదల చేయడం జరిగింది. సినిమా అన్ని వర్గాల వారిని ఆకట్టుకునేలా ఒక విభిన్నమైన నేపథ్యంలో సాగుతుందని మేకర్స్ చెబుతున్నారు.

చరిత్ర మర్చిపోయిన ఒక రాజు గురించిన సినిమా ఇది అంటూ మొదటి నుండి కూడా ప్రకటించడం జరిగింది. నందమూరి అభిమానులతో పాటు ఇతర ప్రేక్షకులు కూడా బింబిసారా సినిమా పై ఆసక్తి చూపిస్తున్నారు. తాజాగా ఈ సినిమా చిత్రీకరణ పూర్తి అయినట్లుగా సమాచారం అందుతోంది. ప్రస్తుతం సినిమా పోస్ట్‌ ప్రొడక్షన్‌ వర్క్ జరుగుతోంది. ఈ సినిమాలో కాస్త గ్రాఫిక్స్ వర్క్‌ ఎక్కువగా ఉండబోతుందట. ఇక ఈ సిమాను విజువల్ గా మంచి ట్రీట్ ఇచ్చేలా విజువల్ ఎఫెక్ట్స్‌ ను చేయిస్తున్నారట. ఇప్పటికే ఈ సినిమా నుండి ఫస్ట్‌ లుక్‌ వచ్చింది. ఇక టీజర్ ను విడుదల చేసేందుకు ముహూర్తంను మేకర్స్‌ కన్ఫర్మ్‌ చేశారు.

బాబాయి బాలకృష్ణ నటించిన అఖండ సినిమా తో బింబిసారా టీజర్‌ ను విడుదల చేయబోతున్నారట. బింబిసారా సినిమా టీజర్ ను అఖండ ప్రదర్శితం కాబోతున్న ప్రతి థియేటర్ లో కూడా స్ట్రీనింగ్ చేసేందుకు ఏర్పాట్లు చేస్తున్నారు. ఇప్పటికే టీజర్‌ కట్టింగ్ పూర్తి అయ్యింది. 90 సెకన్ల పాటు ఈ టీజర్ ఉంటుందని చెబుతున్నారు. డిసెంబర్‌ 2న బాబాయి అఖండ సినిమాతో కలిసి అబ్బాయి బింబిసారా టీజర్ రాబోతుంది. నందమూరి అభిమానులకు ఒకే టికెట్టు పై రెండు సినిమాలు అన్నట్లుగా నెటిజన్స్‌ కామెంట్స్ చేస్తున్నారు. ఈ సినిమా మంచి విజయాన్ని సొంతం చేసుకుంటుందనే నమ్మకంతో కళ్యాణ్ రామ్‌ ఉన్నాడు. భారీ బడ్జెట్‌ తో రూపొందుతున్న ఈ సినిమా ను వచ్చే ఏడాది సమ్మర్ కు విడుదల చేసే అవకాశాలు ఉన్నాయి. టీజర్ లో విడుదల తేదీని ప్రకటిస్తారేమో చూడాలి.