'బింబిసార 2' లేటెస్ట్ అప్డేట్..!

నందమూరి కళ్యాణ్ రామ్ హీరోగా నటించిన ఫిక్షనల్ సోసియో ఫాంటసీ యాక్షన్ మూవీ ''బింబిసార'' బాక్సాఫీస్ వద్ద బ్లాక్ బస్టర్ విజయాన్ని అందుకున్న సంగతి తెలిసిందే. ఫస్ట్ వీకెండ్ లోనే బ్రేక్ ఈవెన్ మార్క్ క్రాస్ అందుకొని.. గత కొన్నేళ్లుగా సరైన హిట్ కోసం ఎదురుచూస్తున్న హీరో కెరీర్ కు జోష్ తీసుకొచ్చింది.

'బింబిసార' సినిమాతో నూతన దర్శకుడు మల్లిడి వశిష్ట ఇండస్ట్రీకి పరిచయం అయ్యాడు. నిర్మాత మల్లిడి సత్యనారాయణ రెడ్డి కొడుకైన వశిష్ట.. గతంలో హీరోగా ఓ సినిమా చేసాడు. ఆ తర్వాత డైరెక్టర్ గా ప్రయత్నాలు మొదలుపెట్టిన అతను.. కళ్యాణ్ రామ్ తో టైమ్ ట్రావెల్ మూవీ తీసి అందరినీ ఆశ్చర్యపరిచాడు.

సరికొత్త కాన్సెప్ట్.. త్రిగర్తల చక్రవర్తి బింబిసారుడిగా కళ్యాణ్ రామ్ నటన.. అద్భుతమైన వీఎఫ్ఎక్స్ గ్రాఫిక్స్ కు ప్రేక్షకులు ఫిదా అయ్యారు. 'బింబిసార' సినిమా ఘనవిజయం సాధించడంతో ఇప్పుడు రెండో భాగంపై భారీ అంచనాలు నెలకొన్నాయి.

నిజానికి ఈ సినిమా రిలీజ్ అవ్వకముందే 'బింబిసార 2' ఉంటుందని దర్శక హీరోలు ప్రకటించారు. మొదటి భాగం అద్భుతమైన విజయం సాధించిన నేపథ్యంలో.. మల్లిడి వశిష్ట ప్రస్తుతం సెకండ్ పార్ట్ స్క్రిప్ట్‌ పై పని చేస్తున్నాడు. ఇప్పటికే ఈ చిత్రానికి సంబంధించిన ప్రీ ప్రొడక్షన్ పనులు ప్రారంభమయ్యాయని తెలుస్తోంది.

ఈ నేపథ్యంలో తాజాగా ఓ బాలీవుడ్ మీడియాతో మాట్లాడిన వశిష్ట.. 'బింబిసార 2' సినిమా గురించి పలు విషయాలు పంచుకున్నారు. కళ్యాణ్ రామ్ కమిటైన ఇతర ప్రాజెక్ట్స్ పూర్తవడాన్ని బట్టి జూన్-జూలై నాటికి తమ సినిమా షూటింగ్‌ ని ప్రారంభించాలని చూస్తున్నట్లు దర్శకుడు తెలిపారు. ఫస్ట్ పార్ట్ భారీ హిట్ అయినందున తనపై విపరీతమైన ఒత్తిడి ఉందని అన్నారు.

ప్రేక్షకులు ఎలాంటి అంచనాలు లేకుండా థియేటర్లకు వెళ్లి, ఒక ఫాంటసీ సినిమా చూశారు. అది క్లిక్ అయింది. సినిమా అంతా వారికి ఆశ్చర్యం కలిగించింది. కానీ ఇప్పుడు పార్ట్-2 లో మనం ఏమి ఇస్తున్నామో తెలుసుకోవడానికి వారు ఆసక్తి కనబరుస్తారు. నేను వారికి కొత్తది ఇవ్వాలి కాబట్టి నాపై కూడా మరిన్ని అంచనాలు మరియు మరింత ఒత్తిడి ఉంటుంది. ఇది పార్ట్ వన్‌ కి ఖచ్చితంగా సంబంధం కలిగి ఉంటుంది అని వశిష్ట పేర్కొన్నారు.

ఇకపోతే కళ్యాణ్ రామ్ రాబోయే ప్రాజెక్ట్స్ విషయానికొస్తే.. మైత్రీ మూవీ మేకర్స్ బ్యానర్ లో నూతన దర్శకుడు రాజేంద్రతో చేస్తున్న సినిమా షూటింగ్ పూర్తయింది. దేనికి 'అమిగోస్' అనే టైటిల్ ను పరిశీలిస్తున్నట్టు సమాచారం. డిసెంబర్ 2న విడుదల చేసేందుకు మేకర్స్ సన్నాహాలు చేస్తున్నారు. త్వరలోనే దీనిపై అధికారిక ప్రకటన రానుంది.

అలానే నందమూరి కళ్యాణ్ రామ్ 'డెవిల్' అనే పాన్-ఇండియన్ చిత్రంలో నటిస్తున్నారు. 1945లో బ్రిటీష్ ఇండియాలోని మద్రాస్ ప్రెసిడెన్సీ నేపథ్యంలో ఒక చీకటి రహస్యాన్ని ఛేదించే బ్రిటిష్ సీక్రెట్ ఏజెంట్ కథతో ఈ సినిమా తెరకెక్కుతోంది. నవీన్ మేడారం దర్శకత్వం వహిస్తున్న ఈ చిత్రాన్ని అభిషేక్ పిక్చర్స్ సంస్థ భారీ బడ్జెట్ తో నిర్మిస్తోంది.

ఇది కాకుండా, దిల్ రాజు బ్యానర్ లో కేవీ గుహన్‌ దర్శకత్వంలో కళ్యాణ్ రామ్ ఓ ఆసక్తికరమైన ప్రాజెక్ట్‌ చేస్తున్నారు. వీటి మధ్యలో మల్లిడి వశిష్ట తో 'బింబిసార 2' సినిమా సెట్స్ మీదకు వెళ్లే అవకాశం ఉంది. ఎన్టీఆర్ ఆర్ట్స్ బ్యానర్ పై హరికృష్ణ ఈ చిత్రాన్ని నిర్మించనున్నారు.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.