బ్లాక్ ఆడ‌మ్ కొత్త ప్రోమో: దుష్ట‌శ‌క్తిపై దైవ‌శ‌క్తి పోరాటం

చెడు మీద మంచి చేసే యుద్ధం.. దుష్ట‌శ‌క్తుల నుంచి ప్ర‌పంచాన్ని కాపాడే హీరోచిత పోరాటాలు సాహ‌సాలు.. ఇలాంటి లైన్ తో ఎన్నో సినిమాలు వ‌స్తూనే ఉన్నాయి. హాలీవుడ్ లో విశ్వం (యూనివ‌ర్శ్) కేట‌గిరీలో సినిమాలు ఇదే థ్రెడ్ తో వ‌స్తున్నాయి. మునుముందు కూడా ఈ థీమ్ మార‌దు. కానీ విజువ‌ల్స్ పాత్ర‌ధారుల మార్పు ఉంటుంది అంతే. ఇప్ప‌టికే అవెంజ‌ర్స్ సిరీస్.. కెప్టెన్ అమెరికా.. స్పైడ‌ర్ మేన్.. బ్లాక్ పాంథ‌ర్.. అవ‌తార్ వంటి సిరీస్ లు ఇదే లైన్ తో తెర‌కెక్కిన‌వే. ఇవ‌న్నీ ప్ర‌పంచవ్యాప్తంగా విడుద‌లై బిలియ‌న్ డాల‌ర్ వ‌సూళ్ల‌తో సంచ‌ల‌నం సృష్టించాయి.

ఇదే కేట‌గిరీలో భారీ హాలీవుడ్ చిత్రం `బ్లాక్ ఆడ‌మ్` విడుద‌ల‌కు సిద్ధ‌మ‌వుతోంది. రాక్ అలియాస్ డ్వేన్ జాన్స‌న్ ఈ చిత్రంలో న‌టించ‌డంతో ఇండియాలోనూ అత‌డి ఫాలోవ‌ర్స్ లో అల‌జ‌డి నెల‌కొంది. ఇప్ప‌టికే విడుద‌లైన `బ్లాక్ ఆడ‌మ్` టీజ‌ర్లు పోస్ట‌ర్లు ఆక‌ట్టుకున్నాయి. మూవీపై హైప్ ని పెంచాయి. ఇప్పుడు ట్రైల‌ర్ విడుద‌లై మ‌రింత‌గా అంచ‌నాలు పెంచేస్తోంది. బ్లాక్ ఆడమ్ ట్రైలర్ కొత్త కామిక్ కాన్ ప్రోమోలో జస్టిస్ సొసైటీతో డ్వేన్ జాన్సన్ తలపడుతున్న తీరు ఆక‌ట్టుకుంది. బ్లాక్ ఆడమ్ కొత్త ఫుటేజ్ కామిక్-కాన్ 2022లో ప్రదర్శించ‌గా వెబ్ లో దూసుకెళుతోంది. అదే విషయాన్ని వెల్ల‌డిస్తూ.. డ్వేన్ జాన్సన్ తన ఇన్ స్టాగ్రామ్ లో `బర్న్ అవుట్ ఆఫ్ రేజ్` అని రాశారు.

ఆటమ్ స్మాషర్- హాక్ మ్యాన్ ల‌ను అభిమానులను పరిచయం చేసిన కొత్త ట్రైలర్ లో డ్వేన్ సూపర్ హీరోగా క‌నిపిస్తున్నారు. జస్టిస్ సొసైటీకి అత‌డు ఆపోజిట్ గా కనిపించాడు. కొత్త ఫుటేజ్ అనేక ఎగ్జ‌యిటింగ్ సన్నివేశాలతో టీజ్ చేసింది. కొత్త ప్రోమో జాన్సన్ పాత్రకు ఆపాదించిన‌ కొత్త శక్తులను అలాగే జస్టిస్ సొసైటీ మెంబ‌ర్స్ ను ప‌రిచ‌య‌యం చేసింది. అతను ప్రపంచాన్ని నాశనం చేసేవాడా లేదా దాని రక్షకుడిగా ఉంటాడా అనే దానిపై ఫ్యాన్స్ లో డిబేట్ ర‌న్ అవుతోంది. కామిక్-కాన్ లో ప్రదర్శించిన ఫుటేజ్ లో జాన్సన్ సూటిగా జస్టిస్ సొసైటీ సభ్యులతో హోరాహోరీ త‌ల‌ప‌డుతున్న తీరు ఆశ్చ‌ర్య‌ప‌రిచింది.

ట్రైలర్ లో రెడ్ టోర్నాడోగా క్వింటెస్సా స్విండెల్.. డాక్టర్ ఫేట్ గా పియర్స్ బ్రాస్నన్ .. ఆటమ్ స్మాషర్ గా నోహ్ సెంటినియోను.. హాక్ మ్యాన్ గా ఆల్డిస్ హాడ్జ్ ను .. అడ్రియానా టోమాజ్ గా సారా షాహీనిని పరిచయం చేసారు. చిత్రంలోని ఇతర తారాగణంలో మార్వాన్ కెంజారి- జేమ్స్ కుసాటి-మోయర్- బోధి సబోంగుయ్- మో అమెర్ - ఉలి లతుకేఫు కూడా ఉన్నారు. స‌ద‌రు తార‌ల‌ పాత్రలు ఇంకా వెల్లడి కాలేదు.

DC కామిక్స్ లో బ్లాక్ ఆడమ్ బిల్లీ బాట్సన్ అకా షాజామ్ ప్రధాన విల‌న్ గా క‌నిపిస్తున్నారు. ఈ చిత్రం కొత్త ప్రోమోలో జాన్సన్ దైవ‌ శక్తులను ఉపయోగిస్తూ క‌నిపించారు. ఈ ప్రోమోతో ఇది భారీ యాక్షన్-ప్యాక్డ్ అడ్వెంచర్ మూవీ అని అర్థ‌మ‌వుతోంది. బ్లాక్ ఆడమ్ 21 అక్టోబర్ 2022న విడుదలవుతుంది. DCEU బ్లాక్ ఆడమ్ కొత్త ఫుటేజీని ఇక‌పై వ‌రుస ఈవెంట్ల‌లో విడుదల చేయ‌నుంద‌ని స‌మాచారం.

తన సోషల్ మీడియాలో కొత్త ప్రోమోను షేర్ చేస్తూ జాన్సన్ ఇలా వ్యాఖ్యానించారు. ``ఆవేశం నుండి పుట్టాను. #కామిక్ కాన్ హాల్ లోని విద్యుద్ధీకరించిన గదిలో మేము విడుదల చేసిన #BlackAdam ప్రత్యేక లుక్. #DCUniverseలో అధికార సిరీస్ గా మారుతోంది`` అని వెల్ల‌డించారు. అంటే ఈ సిరీస్ లో వ‌రుస చిత్రాల‌ను అభిమానులు వీక్షించే అవ‌కాశం ఉంద‌ని హింట్ ఇచ్చారు.