పాక్ నటులపై టీవీ ఛానల్ స్టింగ్ ఆపరేషన్

పెద్దనోట్ల రద్దు నేపథ్యంలో ఇప్పుడందరూ బ్లాక్ మనీ గురించే మాట్లాడుకుంటున్న పరిస్థితి. ఇలాంటి వేళ.. పాకిస్థాన్ నటులు.. భారతీయులకు సుపరిచితులైన నటుల మేనేజర్లపై ఒక టీవీ ఛానల్ స్టింగ్ ఆపరేషన్ నిర్వహించింది. సదరు నటులు తీసుకునే పారితోషికం వైట్ ఎంత? బ్లాక్ ఎంత? అన్న సంచలన విషయాలు ఈ ఆపరేషన్లో బయటకు వచ్చాయి. అయితే.. ఈ వీడియో విశ్వసనీయత మీద సందేహాలు వ్యక్తమవుతున్నాయి.

ఇదిలా ఉంటే.. స్టింగ్ ఆపరేషన్లు నిర్వహించిన మేనేజర్లకు సంబంధించిన నటులుఎవరంటే..ఫవద్ ఖాన్.. రాహత్ ఫతే అలీ ఖాన్.. మావ్రా హోకేన్ లాంటి వారు ఉన్నారు. గుట్టుచప్పుడు కాకుండా పూర్తి చేసిన ఈ స్టింగ్ ఆపరేషన్ వివరాల్లోకి వెళితే.. ఢిల్లీకి చెందిన ఒక పెద్ద పారిశ్రామివేత్త వద్ద తాము మేనేజర్లుగా పని చేస్తున్నమని ఛానల్ రిపోర్టర్లు చెప్పారు. సదరు పారిశ్రామికవేత్త కుమార్తె వివాహం జరుగుతుందని.. సంగీత్ కార్యక్రమంలో పాల్గొనేందుకు పాక్ నటులు ప్రదర్శన ఇస్తారా? అని అడిగారు.

షఫ్కత్ అనే పాక్ ఆర్టిస్ట్ వద్ద పని చేస్తున్న మేనేజర్ ను కలిసి ఫీజు ఎంత చెల్లించాల్సి ఉంటుందన్న ప్రశ్నకు.. రూ.25 లక్షల ఫీజు.. సేవా పన్ను ఇతర ఖర్చుల్ని డిమాండ్ చేశారు. అందులో రూ.5 – 7 లక్షల వైట్ ఇస్తామని.. మిగిలింది బ్లాక్ లో ఇస్తామంటే సదరు నటుడి మేనేజర్ ఓకే చెప్పేశారు. రాహత్ ఫతే అలీ ఖాన్ తో కూడా ఇదే తరహా ఒప్పందాన్ని చేసుకున్నారు. ఇక.. పాక్ నటుడిగా సుపరిచితుడు.. పలు బాలీవుడ్ చిత్రాల్లో నటించిన ఫవద్ ఖాన్ వద్ద మేనేజర్ గా పని చేస్తున్న వ్యక్తిని కలిసిన ఛానల్ ప్రతినిధులకు ప్రైవేటు కార్యక్రమంలో సదరు నటుడు రావాలంటే రూ.70లక్షలు ఇవ్వాలని డిమాండ్ చేశారు.

మొత్తం అమౌంట్ ను వైట్ లో ఇస్తే సమస్యలు ఎదురవుతాయన్న ఛానల్ ప్రతినిధుల మాటకు.. ఎంత మొత్తాన్ని వైట్ లో ఇవ్వాలి.. ఎంత మొత్తాన్ని బ్లాక్ లో ఇవ్వాలన్నది ఫోన్లో మాట్లాడుకుందామని చెబుతూనే.. మొత్తంలో 25 శాతం బ్లాక్ లోనూ మిగిలింది వైట్ లో జమ చేయాలని కోరినట్లుగా సదరు ఛానల్ వెల్లడించింది. పాక్ నటులతో పాటు.. బాలీవుడ్.. టాలీవుడ్.. కోలీవుడ్ అగ్ర నటుల మేనేజర్లతో కూడా మాట్లాడితే మరెన్నిగుట్లు బయటకు వచ్చేవో..?

Like Us on Facebook : https://www.facebook.com/Tupakidotcom/