బాలయ్య కీర్తికిరీటంలో ఇవే టాప్‌

ఈ నాలుగు దశాబ్ధాల్లో బాలయ్య ఎన్నో సినిమాల్లో నటించారు. 100 సినిమాలకు చేరువలోకి వచ్చారు. ప్రస్తుతం 99వ పరుగు వద్ద ఉన్నారు. వందో సినిమాకి ప్రణాళికలు సిద్ధమవుతున్నాయి. అయితే ఇప్పటికే రిలీజైన 98 సినిమాల్లో ఆణిముత్యాల్ని ఏరాల్సి వస్తే ఓ పది మరపురానివి ఉన్నాయి. అవన్నీ బాలయ్య కెరీర్‌ని మెట్టు మెట్టు పైకి ఎక్కించినవే.

టాలీవుడ్‌ హిస్టరీలో చెరగని అక్షరాలతో ముద్రితమైన ఆ సినిమాల జాబితాని పరిశీలిస్తే.. మంగమ్మగారి మనవడు, ముద్దుల మావయ్య, నారీ నారీ నడుమమురారి, ఆదిత్య 369, రౌడీ ఇన్‌స్పెక్టర్‌, భైరవద్వీపం, సమరసింహారెడ్డి, నరసింహానాయుడు, సింహా, లెజెండ్‌ టాప్‌ 10లో నిలిచాయి. ఈ పది సినిమాలు బాలయ్యకు ఓ రేంజులో పేరు తెచ్చాయి. అతడిని నమ్ముకున్న దర్శకనిర్మాతలకు కూడా పేరుకు పేరు డబ్బుకు డబ్బు తెచ్చాయి. ఈ సినిమాలో ఆదిత్య 369 ప్రయోగాత్మక సినిమాగా పేరు తెచ్చింది. సమరసింహారెడ్డి ట్రెండ్‌ సెట్టర్‌గా నిలిచిన సినిమా. ఫ్యాక్షన్‌ సినిమాల ఒరవడినే మార్చేసిన చిత్రమది. లెజెండ్‌ అతడి కీర్తి కిరీటంలో సరికొత్త మైలురాయిని తాకిన సినిమా. పట్టుమని పది రోజులైనా ఆడని ఈ రోజుల్లో ఏకంగా 400 రోజులు ఆడి సంచలనం సృష్టించింది.

అలాగే రూపం చూసి వయసు ఇంత అని చెప్పలేనంత గొప్ప ఆరోగ్యకరమైన జీవితాన్ని నడిపించింది కూడా బాలయ్య మాత్రమే. ఇప్పటికీ పక్కపాపిడి దువ్వుకుంటూ, మీసం సవరిస్తూ నవయవ్వన మన్మోహనుడిగా కనిపిస్తున్నాడు. ఆ అందం ఎక్కడా చెక్కు చెదరలేదు. అది సంగతి.