దత్తత బాట పడుతున్న బాలీవుడ్

బాలీవుడ్ హాట్‌ స్టార్ సన్నీలియన్ - డేనియల్ వెబర్ దంపతులు ఓ చిన్నారిని దత్తత తీసుకున్నారు. మహారాష్ట్రలోని లాతూర్‌ కు చెందిన బాలికను దత్తత తీసుకున్న వారు ఆ పాపకు నిషా కౌర్ వెబర్ అని నామకరణం చేశారు. ఈ నేపథ్యంలో సన్నీ దంపతులకు బాలీవుడ్ నటుల నుంచి శుభాకాంక్షలు అందుతున్నాయి.

కాగా బాలీవుడ్ ప్రముఖులు ఇలా దత్తత తీసుకోవడం తక్కువే. ఎక్కువగా ఐవీఎఫ్ విధానంలో పిల్లలను కంటుంటారు.. లేదంటే ఇటీవల సరోగసీనీ ఆశ్రయిస్తున్నారు. షారూక్ ఖాన్.. అమీర్ - తుషార్ కపూర్ - కరణ్ జోహార్ వంటివారంతా అలాగే చేశారు. అందుకు భిన్నంగా సన్నీ మాత్రం దత్తత బాట పట్టింది.

హాలీవుడ్ లో ఎక్కువ మంది సెలబ్రిటీలు పిల్లలను దత్తత తీసుకుంటారు. టామ్ క్రూయిజ్ - ఏంజెలినా జోలీ - బ్రాడ్ పిట్ వంటివారంతా ఈమార్గమే అనుసరించారు. బాలీవుడ్ లో ఇలాంటి ప్రాక్టీస్ ఎక్కువగా లేనప్పటికీ కొందరు మాత్రం దత్తత తీసుకున్నవారున్నారు.

పిల్లలను దత్తత తీసుకున్న బాలీవుడ్ ప్రముఖులు

* సన్నీలియోన్... తాజాగా ఓ పాపను దత్తత తీసుకుంది.

* సుస్మిత సేన్.. చాలాకాలం కిందటే ఇద్దరు అమ్మాయిలను దత్తత తీసుకుంది.

* రవీనా టాండన్.. తనకు 21 ఏళ్లున్నప్పుడే ఇద్దరు అమ్మాయిలను పెంచుకుంది.

* సలీంఖాన్.. సల్మాన్ ఖాన్ తండ్రి అయిన ఈ పాపులర్ స్క్రిప్ట్ రైటర్ తనకు ముగ్గురు కుమారులు, ఒక కుమార్తె ఉన్నా కూడా మరో అమ్మాయిని దత్తత తీసుకున్నారు. ఆ అమ్మాయి అర్పితకు 2015లో హైదరాబాద్ లోని ఫలకునుమా ప్యాలస్ లో ఘనంగా వివాహం జరిపించిన సంగతి తెలిసిందే.

* మిథున్ చక్రవర్తి... మిథున్ చక్రవర్తికి కూడా పిల్లలున్నప్పటికీ చెత్త కుప్పలో కనిపించిన ఓ చిన్నారిని పెంచి పెద్ద చేశారు. ఆ పాప ఇప్పుడా కుటుంబంలో అల్లారుముద్దుగా పెరుగుతోంది.