బాలీవుడ్‌ సూపర్ స్టార్‌ ను సౌత్ స్టార్స్‌ తో నింపేస్తున్నారు

ఒకప్పుడు టాలీవుడ్ మరియు కోలీవుడ్‌ స్టార్స్ ను ఉత్తరాది ప్రేక్షకులు కాని.. బాలీవుడ్ వారు కాని పెద్దగా పట్టించుకునే వారు కాదు. కాని ఇప్పుడు పరిస్థితి మారింది. సౌత్ కు చెందిన పలువురు స్టార్‌ హీరోలకు ఉత్తర భారతంలో మంచి గుర్తింపు లభించింది. ప్రభాస్ నుండి మొదలుకుని ఎంతో మంది హీరోలు పాన్ ఇండియా సినిమాల ద్వారా లేదా మరో రకంగా ఉత్తరాది ప్రేక్షకులకు చేరువ అయ్యారు.

ఉత్తరాది ప్రేక్షకులు ప్రస్తుతం సౌత్‌ సినిమాల మోజులో ఉన్నారు. మన సినిమాలను మరియు మన స్టార్స్ ను వారు తెగ అభిమానిస్తున్నారు. అందుకే బాలీవుడ్‌ ఫిల్మ్‌ మేకర్స్‌ కూడా సౌత్ స్టార్స్ ను వారి వారి సినిమా ల్లో నటింపజేయాలని భావిస్తున్నారు. బాలీవుడ్‌ సూపర్‌ స్టార్‌ సల్మాన్ ఖాన్ తన సినిమా లో సౌత్ స్టార్స్ ను నటింపజేయడమే అందుకు ప్రత్యక్ష నిదర్శనం అనడంలో సందేహం లేదు.

ఇటీవలే చిరంజీవి సినిమాలో సల్మాన్ ఖాన్ నటించిన విషయం తెల్సిందే. మరో వైపు సల్మాన్ ఖాన్ తాజా హిందీ చిత్రం 'కభీ ఈద్ కభీ దివాళి' సినిమా లో మన స్టార్‌ రామ్‌ చరణ్ కీలక పాత్రలో గెస్ట్‌ గా కనిపించబోతున్నాడట. దాంతో ఆ సినిమాకు ఇక్కడ కూడా మంచి బజ్‌ క్రియేట్‌ అయ్యే అవకాశం ఉందని వార్తలు వస్తున్నాయి.

ఈ సమయంలోనే తెలుగు స్టార్‌ నటుడు జగపతి బాబు కూడా సల్మాన్‌ ఖాన్‌ సినిమాలో కనిపించబోతున్నాడు. ఇప్పటి వరకు పలు భాషల సినిమాల్లో విలన్‌ గా కనిపించి మెప్పించిన జగపతి బాబు ఇప్పుడు బాలీవుడ్‌ లో ఏకంగా సల్మాన్‌ ఖాన్ సినిమా లో విలన్ గా నటించేందుకు సిద్ధం అయ్యాడని తెలుస్తోంది.

సల్మాన్ ఖాన్‌ కభీ ఈద్‌ కభీ దివాళి సినిమా లో రామ్‌ చరణ్‌ కీలకమైన గెస్ట్‌ రోల్‌ లో నటించడంతో పాటు జగపతి బాబు విలన్‌ గా నటించడం మాత్రమే కాకుండా సౌత్ స్టార్‌ హీరోయిన్‌ పూజా హెగ్డే హీరోయిన్ గా నటిస్తున్న విషయం తెల్సిందే.

మొత్తానికి సల్మాన్‌ ఈ మోస్ట్‌ క్రేజీ ప్రాజెక్ట్‌ ను మన సౌత్‌ స్టార్స్ తో నింపేస్తున్న నేపథ్యంలో అక్కడ ఇక్కడ మంచి బజ్ క్రియేట్ అయ్యే అవకాశాలు పుష్కలంగా కనిపిస్తున్నాయి.