ఫైటింగులు చేస్తున్న బా.. భామలు..

బాలీవుడ్ అంటేనే గ్లామర్ కి మరో పేరు. బాలీవుడ్ హీరోయిన్ అనగానే అందాలు చిందించే వయ్యారి భామలు కళ్ల ముందు కదలాడాల్సిందే. నాజూగ్గా కనిపించే ఈ నాయకీ మణులు ఇప్పుడు కొత్త తరహా పాత్రలకు కూడా సై అంటున్నారు. బికినీ వేసిన బాడీకే.. బాక్సింగ్ లు - ఫైటింగులు కూడా నేర్పిస్తున్నారు. టాప్ హీరోయిన్ ప్రియాంక చోప్రా జై గంగాజల్ మూవీలో ఎస్పీ పాత్రలో కనిపించనుంది. ఈ మూవీలో తనలోని యాక్షన్ యాంగిల్ ని చూపించనుంది ప్రియాంక. హీరోయిన్స్ చేసే ఫైటింగులను కూడా ప్రేక్షుకులు ఎంజాయ్ చేయాలని అనుకుంటున్నారని చెప్పింది.

మాస్ మూవీస్ కి బెస్ట్ హీరోయిన్ అనిపించుకున్న సోనాక్షి సిన్హా కూడా ఫైటింగుల దుమ్ము దులుపుతోంది. ఇప్పుడు సెట్స్ పై ఉన్న అకిర - ఫోర్స్2 చిత్రాల్లో యాక్షన్స్ సీక్వెన్స్ లలో ఇరగదీస్సేసింది అని తెలుస్తోంది. ఈ మూవీ కోసం తనే సొంతగా కొన్ని ఫైట్స్ కూడా డిజైన్ చేసిందట సోనాక్షి. ఇక సల్లూభాయ్ మూవీతో క్రేజ్ సంపాదించిన శ్రీలంక బ్యూటీ జాక్వెలిన్ ఫెర్నాండెజ్ కూడా.. జాన్ అబ్రహం - వరుణ్ ధావన్ ల మూవీ డిషూమ్ - డిషూమ్ లో పోరాటాలు చేసేస్తోంది.

సాలా ఖద్దూస్ తో బాలీవుడ్ లో అడుగు పెడుతున్న బాక్సింగ్ ప్లేయర్ రితికా సింగ్ కూడా రింగులో చెలరేగిపోనుంది. ఇక మరో బ్యూటీ అనుష్క శర్మ కూడా సుల్తాన్ లో మల్లయోధురాలి పాత్రలో నటిస్తోంది. ఈ మూవీలో ఏకంగా సల్మాన్ కి టఫ్ ఫైట్ ఇచ్చే ఫైటర్ అంటున్నారు. మొత్తం బాలీవుడ్ హీరోయిన్స్ అంతా ఒకేసారి ఫైటింగుల బాట పట్టేయడం విశేషమే కదా.