టాలీవుడ్ డైరెక్టర్స్ ను హైజాక్ చేస్తున్న బాలీవుడ్..!

పాన్ ఇండియా సినిమాల సందడి మొదలైన తర్వాత భాషా బేధాలు తొలగిపోయాయి.. ప్రాంతీయ హద్దులు చెరిగిపోయాయి. తెలుగు సినిమా ఖ్యాతి ప్రపంచ వ్యాప్తంగా పాకిన తర్వాత ఇతర భాషల నటీనటులు టాలీవుడ్ లో ఎంట్రీ ఇవ్వడానికి రెడీ అవుతున్నారు. బాలీవుడ్ హీరోలు సైతం మన దర్శకులతో వర్క్ చేయడానికి ఆసక్తి కనబరుస్తున్నారు. తెలుగు సినిమాలను తమతో రీమేక్ చేయమని కోరుతున్నారు. ఎప్పటికప్పుడు మన టాలెంటెడ్ డైరెక్టర్స్ ను హైజాక్ చేయడానికి సిద్ధమవుతున్నారు.

లేటెస్టుగా 'కార్తికేయ 2' చిత్రంతో బిగ్గెస్ట్ బ్లాక్ బస్టర్ అందుకున్న డైరెక్టర్ చందూ మొండేటి.. ఇప్పుడు బాలీవుడ్ మేకర్స్ దృష్టిని ఆకర్షించాడు. ప్రస్తుతం టాలెంటెడ్ డైరెక్టర్ హిందీ ఆఫర్స్ తో ఉక్కిరిబిక్కిరి అవుతున్నాడని తెలుస్తోంది. చందూ ఇప్పటికే యంగ్ హీరో కార్తీక్ ఆర్యన్ తో సహా మరో ఇద్దరు హిందీ హీరోలని కలిసినట్లు సమాచారం.

ఇకపోతే 'బాహుబలి' తో సంచలనం సృష్టించిన దర్శక ధీరుడు ఎస్ఎస్ రాజమౌళి తో సినిమా చేయడానికి పాపులర్ బాలీవుడ్ స్టార్స్ అంతా వేచి చూస్తున్నారు. కాకపోతే జక్కన్న మాత్రం ఇప్పటి వరకూ తెలుగు స్టార్స్ తోనే సినిమాలు చేసి పాన్ ఇండియా స్థాయిలో సత్తా చాటుతున్నారు.

'అర్జున్ రెడ్డి' దర్శకుడు సందీప్ రెడ్డి వంగా.. అదే సినిమాని షాహిద్ కపూర్ తో 'కబీర్ సింగ్' పేరుతో రీమేక్ చేసి హిందీలోనూ హిట్ కొట్టాడు. ప్రస్తుతం రణబీర్ కపూర్ తో 'యానిమల్' చిత్రాన్ని తెరకెక్కిస్తున్నారు. అప్పట్లో 'గబ్బర్' సినిమాని హిందీలో డైరెక్ట్ చేసిన క్రియేటివ్ డైరెక్టర్ క్రిష్ జాగర్లమూడి.. 'మణికర్ణిక' మూవీలోనూ భాగమయ్యారు.

'ప్రస్థానం' సినిమాని బాలీవుడ్ లోకి తీసుకెళ్లిన దర్శకుడు దేవా కట్టా.. తొలి ప్రయత్నంలో విజయం సాధించలేకపోయాడు. 'జెర్సీ' సినిమాతో మంచి సక్సెస్ అందుకున్న యంగ్ డైరెక్టర్ గౌత‌మ్ తిన్ననూరి.. అదే సినిమాని హిందీలో రీమేక్ చేశారు.

అలానే 'హిట్' సినిమాతో మెప్పించిన శైలేష్ కొలను.. ఈ సినిమా హిందీ రీమేక్ తో బాలీవుడ్ లో ఎంట్రీ ఇచ్చాడు. అయితే గౌతమ్ - శైలేష్ లకు అక్కడ నిరాశే ఎదురైంది. 'ఘాజీ' ఫేమ్ సంకల్ప్ రెడ్డి కూడా హిందీలో స్ట్రయిట్ మూవీ చేస్తున్నాడు.

నిజానికి టాలీవుడ్ డైరెక్టర్స్ బాలీవుడ్ లో సినిమాలు చేయడమనేది ఎప్పటి నుంచో జరుగుతున్నదే. అప్పట్లోనే ఆదుర్తి సుబ్బారావు - కె. బాపయ్య - బాపు - దాసరి నారాయణరావు - కె. రాఘవేంద్రరావు - కె. విశ్వనాథ్ - ఈవీవీ సత్యనారాయణ - రవిరాజా పినిశెట్టి వంటి దర్శకులు నేరుగా హిందీలో సినిమాలు చేశారు.

రామ్ గోపాల్ వర్మ - తేజ - విజయ్ భాస్కర్ - కృష్ణవంశీ - పూరీ జగన్నాథ్ - రాజ్&డీకే వంటి దర్శకులు కూడా బాలీవుడ్ లో అడుగుపెట్టారు. వీరిలో కొందరు హిందీలోనూ మంచి విజయాలు అందుకున్నారు. ఇదే క్రమంలో ఇప్పుడు పాన్ ఇండియా స్థాయిలో సత్తా చాటుతున్న దర్శకులపై బాలీవుడ్ కన్ను పడుతోంది.

బాలీవుడ్ సూపర్ స్టార్ సల్మాన్ ఖాన్ కూడా ఇప్పుడు టాలీవుడ్ డైరెక్టర్ కోసం వేచి చూస్తున్నట్లు తెలుస్తోంది. సల్మాన్‌ కి అత్యంత సన్నిహితుడు అయిన ఓ నిర్మాత ఇప్పటికే స్క్రిప్ట్‌ ని సిద్ధం చేసుకున్నాడని అంటున్నారు. అయితే సల్లూ భాయ్ ఈ ప్రాజెక్ట్ కు దర్శకుడిని వెతికే బాధ్యతను రామ్ చరణ్‌ కు అప్పగించినట్లు టాక్. అన్నీ కుదిరితే ఈ మూవీలో సల్మాన్ - చెర్రీ కలిసి నటించే అవకాశం ఉందని రూమర్స్ వస్తున్నాయి. దీనిపై క్లారిటీ రావాలంటే ఇంకొన్నాళ్లు ఆగాల్సిందే.

నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.