'మహేష్ - జాన్వీ'లతో బాలీవుడ్ ప్రొడ్యూసర్ భారీ ప్లాన్..!

టాలీవుడ్ సూపర్ స్టార్ మహేష్ బాబు ప్రస్తుతం సర్కారు వారి పాట షూటింగ్ పనుల్లో బిజీగా ఉన్నాడు. ఆ సినిమా 2022 సంక్రాంతి సమయంలో విడుదల కానుంది. అయితే సర్కారు వారి షూటింగ్ ముగిసిన తర్వాత మహేష్.. బాహుబలి దర్శకుడు ఎస్ఎస్ రాజమౌలితో కాంబినేషన్ లో సినిమా చేయనున్నాడు. ప్రస్తుతం రాజమౌళి ఆర్‌ఆర్‌ఆర్ షూటింగ్ పనుల్లో బిజీగా ఉన్నాడు. అయితే మహేష్ బాబు రాజమౌళి సినిమాకు డేట్స్ కేటాయించే ముందు మరో సినిమా చేసే ఆలోచనలో ఉన్నట్లు తెలుస్తుంది. ఎందుకంటే రాజమౌళి సినిమా అంటే డేట్స్ పూర్తిగా పెద్దమొత్తంలో కేటాయించాల్సి ఉంటుంది. తాజా సమాచారం ప్రకారం.. సోషల్ మీడియాలో మహేష్ బాబు తదుపరి సినిమా గురించి ఓ వార్త వైరల్ అవుతోంది.

అదేంటంటే మహేష్ బాబు.. ఎస్ఎస్ రాజమౌలి సినిమాకు ముందు అతిలోకసుందరి శ్రీదేవి కుమార్తె జాన్వీ కపూర్‌తో ఓ పాన్ ఇండియా సినిమాలో నటించనున్నాడట. ఈ మూవీని బాలీవుడ్ బడా ప్రొడ్యూసర్ కరణ్ జోహార్ నిర్మించనున్నట్లు టాక్. మహేష్, జాన్వీలతో సినిమా షూటింగ్ ప్రారంభించడానికి కరణ్ ఓ యువదర్శకుడికోసం వెతుకుతున్నాడట. అలాగే మహేష్ ఈ చిత్రానికి చాలా తక్కువ తేదీలను కేటాయించాడని.. కరణ్ ఈ సినిమా పనులను 60 రోజుల్లో వేగంగా పూర్తి చేయాలని యోచిస్తున్నట్లు బాలీవుడ్ కథనాలు చెబుతున్నాయి. ఈ వార్త ఎంతవరకు నిజమో తెలియదు కాని.. ఇదే నిజమైతే గనక సూపర్ స్టార్ కృష్ణ - శ్రీదేవి బెస్ట్ జోడిలలో ఒకరు. ఇప్పుడు వారిద్దరి వారసులు మహేష్ బాబు - జాన్వీకపూర్ సినిమా కోసం సినీప్రేక్షకులు మాత్రం ఆశగా ఎదురుచూస్తున్నారు. చూడాలి మరి త్వరలో ఏదైనా తీపికబురు వినిపిస్తుందేమో!