డ్రగ్స్ కేసులో బాలీవుడ్ బడా హీరో కొడుకు అరెస్టు?

సంచలనం చోటు చేసుకుంది. గడిచినకొంతకాలంగా డ్రగ్స్ వినియోగానికి సంబంధించిన ఉదంతాల్లో చిత్ర పరిశ్రమకు చెందిన పలువురు ఇరుక్కోవటం.. కేసుల చిక్కులతోనానా ఇబ్బందులకు గురవుతున్నారు. డ్రగ్స్ మాట ఎత్తితేనే ఆమడదూరానికి పారిపోయేలా సినీ రంగానికి చెందిన వారు ఉంటున్న పరిస్థితి. ఇలాంటివేళలో.. బాలీవుడ్ బడా హీరో కొడుకు ఒకరు తాజాగా ముంబయిలోని ఒక క్రూయిజ్ లో డ్రగ్స్ పార్టీ చేసుకుంటూ పోలీసులకు అడ్డంగా దొరికిపోయినట్లుగా చెబుతున్నారు. బాలీవుడ్ లో ఇప్పుడీ ఉదంతం సంచలనంగా మారినట్లు చెబుతున్నారు.

విశ్వసనీయ వర్గాల నుంచి అందుతున్న సమాచారం ప్రకారం ముంబయిలోని ఒక పెద్ద క్రూయిజ్ షిప్ లో ఎన్ సీబీ (నార్కోటిక్స్ కంట్రోట్ బ్యూరో) పెద్ద ఎత్తున సోదాలు నిర్వహించినట్లు చెబుతున్నారు. ఇందులో పెద్ద ఎత్తున మాదక ద్రవ్యాల్ని స్వాధీనం చేసుకున్నట్లుగా తెలిసింది. ఈ సందర్భంగా పలువురిని అదుపులోకి తీసుకోగా.. వారిలో బాలీవుడ్ కు చెందిన బడా హీరో కొడుకు ఉన్నాడని.. అతడే ఈ పార్టీని నిర్వహించినట్లు చెబుతున్నారు.

ఈ పార్టీ ముంబయిలోని సముద్రంలో జరిగినట్లుగా చెబుతున్నారు. ఈ పార్టీకి సెలబ్రిటీలు.. సంపన్న కుటుంబాలకు చెందిన పిల్లలు పలువురు హాజరైనట్లుగా సమాచారం. ఈ పార్టీలో పెద్ద ఎత్తున డ్రగ్స్ ను వినియోగించినట్లుగా తెలుస్తోంది. పక్కా సమాచారాన్ని అందుకున్న ఎన్ సీబీ అధికారులు ఈ షిప్పు మీద దాడి చేశారు. ఈ క్రూయిజ్ లో ఒక ఫ్యాషన్ షోను నిర్వహించారు. దాదాపు 1500 మంది హాజరైన పార్టీకి ఢిల్లీ నుంచి కూడా పెద్ద ఎత్తున బిజినెస్ మేన్ లు వచ్చినట్లుగా చెబుతున్నారు. సోదాల సందర్భంగా కొకైన్.. డ్రగ్స్.. ఎండీ డ్రగ్స్ ను స్వాధీనం చేసుకొని.. పలువురిని అదుపులోకి తీసుకున్నారని.. వారిలో ప్రముఖులు చాలామంది ఉన్నట్లు చెబుతున్నారు. అయితే.. ఈ వివరాలేవీ కూడా అధికారికంగా వెల్లడి కాలేదు. ఇప్పుడీ ఉదంతం హైక్లాస్ సర్కిల్స్ లో హాట్ టాపిక్ గా మారినట్లుగా తెలుస్తోంది.