బాలయ్య కోసం బాలీవుడ్ టెక్నీషియన్

ఒక్కసారి మొదలు పెడితే ఆగదు అనేలా నందమూరి బాలకృష్ణ తన సినిమాను ప్లాన్ చేసుకుంటాడన్న విషయం తెలిసిందే. ఇక ఎన్టీఆర్ బయోపిక్ ప్రాజెక్ట్ కూడా అదే తరహాలో వెళ్లాలని ప్రీ ప్రొడక్షన్ పనులను పూర్తి చేసుకుంటున్నాడు. ఇప్పటికే చిత్ర యూనిట్ ని బాలయ్య ఫైనల్ చేశాడు. ఎక్కడా కూడా రేంజ్ తగ్గకుండా బాలకృష్ణ చాలా జాగ్రత్తలు తీసుకుంటున్నాడు. తానే నిర్మాత కావున మంచి టీమ్ ను సెట్ చేసుకున్నాడు.

సంగీత దర్శకుడిగా కీరవాణిని ఫైనల్ చేశారు. 2008లో పాండురంగడు సినిమా తరువాత బాలయ్య సినిమాకు కీరవాణి పని చేయలేదు. ఇప్పుడు ఎన్టీఆర్ బయోపిక్ ద్వారా పదేళ్ల తరువాత ఒక్కటవుతున్నారు. ఇక మరో ముఖ్యమైన విషయానికి వస్తే.. బాలీవుడ్ టాప్ సినిమాటోగ్రాఫర్ ని బాలకృష్ణ సెలెక్ట్ చేసుకున్నారు. ఎమ్ ఎస్.ధోని:ది అన్ టోల్డ్ స్టోరీ - కాల్ - క్రిష్ వంటి బడా సినిమాలకు వర్క్ చేసిన సంతోష్ తుండియిల్ ఎన్టీఆర్ బయోపిక్ కి సినిమాటోగ్రఫీ అందించనున్నాడు.

ఇక ఆర్ట్ డైరెక్షన్ లో ప్రస్తుతం బెస్ట్ జోడిగా వినిపిస్తోన్న మౌనిక - రామకృష్ణ ఈ సినిమా కోసం వర్క్ చేస్తున్నారు. రంగస్థలం సినిమాకు ఆర్ట్ డైరెక్టర్స్ గా వర్క్ చేసింది వీరే. ఇక రేపు హైదరాబాద్ లో సినిమా అఫీషియల్ గా లాంచింగ్ కార్యక్రమాలను ప్లాన్ చేసుకుంది. తేజ డైరెక్ట్ చేయబోయే ఈ ప్రాజెక్ట్ ను నందమూరి బాలకృష్ణ - వారాహి సంస్థ సాయి కొర్రపాటి సంయుక్తంగా నిర్మించనున్నారు. 2019 సంక్రాంతి కానుకగా సినిమా రిలీజ్ చేయాలని చిత్ర యూనిట్ ఫిక్స్ అయ్యింది.