బోయపాటి-బాలయ్య అప్డేట్లో లేరుగా..!

లాక్ డౌన్ ముగిసింది.. సినిమా షూటింగులకు పర్మిషన్ వచ్చింది.. ఆ తర్వాత థియేటర్ల ఓపెన్ కూ అనుమతి లభించింది.. కొత్త సంవత్సరంలో సినిమాలు వరుసగా టాకీసులకు క్యూ కడుతున్నాయి. ఆల్రెడీ షూట్ లో ఉన్నవి శరవేగంగా దూసుకెళ్తున్నాయి. కొత్తవి సెట్స్ మీదకు వచ్చేస్తున్నాయి. కానీ.. బాలయ్య-బోయపాటి కాంబోలో రూపొందుతున్న బీబీ-3 మాత్రం అప్డేట్లో లేదు.

ఈ సంక్రాంతికి నాలుగు సినిమాలు బాక్సాఫీస్ రేసులో నిలిచాయి. ఇక, కొత్త సినిమాల కబుర్లు చాలానే వినిపిస్తున్నాయి. ఫస్ట్ లుక్‌లు, టీజర్లు అంటూ దుమ్ము లేపుతున్నాయి. మరోవైపు థియేటర్లలో ప్రేక్షకుల సందడి వేగం పుంజుకుంటోంది. దీంతో పలు సినిమాల మేకర్స్ ముందుగానే మేల్కొని సమ్మర్ సీజన్లో కర్చీఫ్‌లు వేసేస్తున్నారు.

ఆ జాబితాలో చాలా సినిమాలే ఉన్నాయి. పవర్ స్టార్ వకీల్ సాబ్, మెగాస్టార్ ఆచార్య, రెబల్ స్టార్ రాధేశ్యామ్ వంటి భారీ చిత్రాలతోపాటు రంగ్ దె, టక్ జగదీష్, అరణ్య లాంటి మీడియం రేంజ్ సినిమాలు కూడా వేసవిపై లుక్కేశాయి. వీటి రిలీజ్‌ డేట్లపై ఓ అంచనా కూడా వచ్చేసింది. ఈ సినిమాల గురించి తరచుగా ఏదో ఒక వార్త వినిపిస్తూనే ఉంది. ‘వకీల్ సాబ్’, ‘రాధేశ్యామ్’ టీజర్ కూడా అతి త్వరలోనే వస్తాయంటున్నారు. కానీ.. బాలయ్య చిత్రం గురించే ఏ సమాచారమూ తెలియట్లేదు.

వాస్తవానికి ఇప్పుడు సెట్స్ మీద ఉన్న, పూర్తయిన సినిమాలన్నింటి గురించి ఏదో ఒక అప్ డేట్‌ వినిస్తూనే ఉంది. మీడియాలో లేదా సోషల్ మీడియాలో డిస్కషన్ నడుస్తోంది. బీబీ-3 గురించి మాత్రం సౌండ్ లేదు. గత ఏడాది బాలయ్య పుట్టిన రోజున టీజర్ వదిలారు. ఆ తర్వాత ఇప్పటి వరకూ పెద్దగా అప్ డేట్ లేదు. టైటిల్, ఫస్ట్ లుక్ గురించిన చర్చ కూడా జరగట్లేదు.

బీబీ-3 టీజర్ రిలీజ్ చేశారంటే అప్పటికే దాదాపు సగం పైనే షూట్ పూర్తయి ఉండాలి. లాక్ డౌన్ ఎత్తేసిన తర్వాత షూటింగులు మొదలై నాలుగు నెలలవుతోంది. అంటే.. ఈ పాటికే షూట్ చివరి దశలో ఉండాలి. కానీ.. ఏమైందనేది తెలియట్లేదు. ఇప్పటి వరకూ సినిమా గురించి ఎలాంటి అప్డేట్ కూడా రాలేదు. ఒకవేళ వేసవికి రిలీజ్ ప్లాన్ చేస్తే.. ఆ మేరకు అధికారిక ప్రకటన చేయాల్సిందే. ఈ పాటికే అనౌన్స్ చేసి, సినిమాను ప్రమోట్ చేసేవారు.

కానీ.. ఇప్పటి వరకూ అలాంటి ఛాయలు కనిపించట్లేదు. ఎందుకిలా చేస్తున్నారని ఫ్యాన్స్ హర్ట్ అవుతున్నారు. అన్ని సినిమాలూ చకచకా దూసుకెళ్తుంటే బాలయ్య సినిమా గురించి కనీసం సమాచారం లేదని దిగులు చెందుతున్నారు. అసలు ఈ సినిమా షూటింగ్ జరుగుతోందా..? అది ఏ దశలో ఉంది అనేది కూడా తెలియట్లేదు. మరి, ఇది వ్యూహాత్మక మౌనమా? లేక మరేదైనా కారణమా? అనేది కూడా అర్థం కావట్లేదు. బోయపాటీ.. బాలయ్య ఫ్యాన్స్ బాధ ఆలకించు ఓసారి.