బాలయ్య సినిమాపై వస్తున్న రూమర్లపై క్లారిటీ ఇచ్చిన డైరెక్టర్..!

నందమూరి బాలకృష్ణ జయాపజయాలతో సంబంధం లేకుండా వరుస సినిమాలతో ఫుల్ బిజీగా ఉన్నారు. ఈ క్రమంలో నందమూరి బాలకృష్ణ హీరోగా మాస్ డైరెక్టర్ బోయపాటి శ్రీను దర్శకత్వంలో ఓ సినిమా రాబోతున్న విషయం తెలిసిందే. ద్వారక క్రియేషన్స్ బ్యానర్ పై యువ నిర్మాత మిర్యాల రవీందర్ రెడ్డి ఈ చిత్రాన్ని నిర్మిస్తున్నారు. కరోనా లాక్‌ డౌన్ కారణంగా ఈ సినిమా షూటింగ్ వాయిదా పడింది. 'సింహా' 'లెజెండ్' చిత్రాల తర్వాత వీరి కాంబినేషన్ లో వస్తున్న హ్యాట్రిక్ సినిమా కావడంతో ఈ సినిమాపై భారీ అంచనాలున్నాయి. ఈ సినిమాను బోయపాటి శ్రీను రాయలసీమ, వారణాసి బ్యాక్‌ డ్రాప్‌ లో తెరకెక్కిస్తున్నారు. ఈ సినిమాలో ఒక పాత్ర కోసం బాలయ్య ఏకంగా గుండు కూడా చేయించుకున్నాడు. ఈ సినిమాలో బాలయ్య మరోసారి రెండు పాత్రల్లో కనిపించనున్నారు. అందులో ఒకటి అఘోర పాత్ర కాగా.. రెండోది ఫాక్షనిస్ట్ పాత్ర అని వార్తలు వస్తున్నాయి. అంతేకాకుండా ఈ సినిమా రాజకీయ నేపథ్యంలో సాగే యాక్షన్ డ్రామా అని రూమర్స్ వినపడుతున్నాయి.

ఈ రూమర్స్ పై స్పందించిన బోయపాటి 'ఇది పొలిటికల్ డ్రామా కాదని.. అన్ని ఎమోషన్స్ ఉండే ఫ్యామిలీ ఎంటర్టైనర్' అని చెప్పాడట. అంతేకాకుండా బాలయ్య 'అఘోర' పాత్రపై వస్తున్న వార్తలపై స్పందిస్తూ 'బాలయ్యని ఇంతకముందు చూడని పాత్రలో చూడబోతున్నారని.. వారణాసి బ్యాక్‌ డ్రాప్‌ లో సినిమా చేస్తుండటం వల్ల ఆ న్యూస్ స్ప్రెడ్ అయ్యుంటుందని' చెప్పుకొచ్చాడట. ఇప్పటికే ఇద్దరు హీరోయిన్లను ఫైనలైజ్ చేశామని.. లాక్ డౌన్ తర్వాత పూర్తి వివరాలు ప్రకటిస్తామని చెప్పాడట. మోస్ట్ పవర్ ఫుల్ గా తెరకెక్కుతున్న ఈ సినిమాకి థమన్ సంగీతాన్ని అందిస్తున్నారని సమాచారం. గతంలో వరుస ఫ్లాపుల్లో ఉన్న బాలయ్యకు ‘సింహా’ బ్లాక్ బస్టర్‌ అందించాడు బోయపాటి శ్రీను. ఆ తర్వాత వీళ్లిద్దరి కాంబోలో వచ్చిన ‘లెజెండ్’ మూవీ అంతకు మించిన సక్సెస్ సాధించింది. ఇప్పుడు మళ్ళీ బాలయ్య వరుస ప్లాపుల్లో ఉన్నాడు. తండ్రి ఎన్టీఆర్ బయోపిక్ గా తెరకెక్కించిన 'ఎన్టీఆర్ కథానాయకుడు' 'ఎన్టీఆర్ మహానాయకుడు' ఘోర పరాజయాన్ని చవిచూశాయి. ఆ తర్వాత వచ్చిన 'రూలర్' కూడా నిరాశపరిచింది. మరి ఈ చిత్రంతో బాలయ్య - బోయపాటి శ్రీను హాట్రిక్ హిట్ సాధించి బాలయ్య మళ్ళీ ట్రాక్ లోకి వస్తాడేమో చూడాలి.