బ్రహ్మాజీ.. అబ్బా ఏం బిజీ

ఏ కేరక్టర్ ఇచ్చినా ఇరగదీస్తాడనే గుర్తింపు యాక్టర్ బ్రహ్మాజీకి ఉంది. హీరో నుంచి కమెడియన్ వరకూ అన్ని రోల్స్ చేసేస్తాడు. ఒకటి అరా సన్నివేశాల్లోనే కనిపించినా, తన మార్క్ చూపించే ట్యాలెంట్ ఉన్న యాక్టర్ బ్రహ్మాజీ. ఇప్పుడీయన చేతిలో ఉన్న ప్రాజెక్టుల లిస్ట్ చూస్తే ఔరా అనిపించక మానదు. ప్రస్తుతం తన కెరీర్ లోనే బెస్ట్ సీజన్ లో ఉన్నానని బ్రహ్మాజీ చెబుతున్నాడు. రీసెంట్ గా కృష్ణగాడి వీర ప్రేమగాధలో బ్రహ్మాజీ చేసిన పాత్రకు అన్ని వర్గాల నుంచి ప్రశంసలు వస్తున్నాయి.

'ఇలాంటి కేరక్టర్లు జన్మకు ఒకసారే వస్తాయి. ఈ మూవీ రిలీజ్ తర్వాత నాకు వందల సంఖ్యలో ఫోన్ కాల్స్, మెసేజ్ లు వచ్చాయి. ఇంత మంచి కేరక్టర్ ఇచ్చిన డైరెక్టర్ హనుకు కృతజ్ఞతలు' అన్నాడు బ్రహ్మాజీ. 'ఇప్పుడు దాదాపు 10సినిమాలు ఒకేసారి చేస్తున్నాను. కొన్ని రోజులుగా అయితే 24గంటలూ షూటింగ్ లోనే ఉంటున్నాను కూడా. వరుసగా సర్దార్ గబ్బర్ సింగ్ షూటింగ్ చేశాక.. వెంటనే వెంకటేష్-మారుతి కాంబినేషన్ లో రూపొందుతున్న చిత్రానికి వెళ్లాను' అన్నాడు బ్రహ్మాజీ.

ఈ రెండు సినిమాలు కాక.. నాగచైతన్య మూవీ ప్రేమమ్ రీమేక్ లోను, మోహన్ లాల్ తో చంద్రశేఖర్ యేలేటి తీస్తున్న చిత్రంలో కూడా చేస్తున్నాడు. నారా రోహిత్ తో అప్పట్లో ఒకడుండేవాడు, ఒక అమ్మాయి తప్ప సినిమాలకు కూడా తనకు మంచి పేరు వస్తుందని బ్రహ్మాజీ అంటున్నాడు. ఇవన్నీ కాకుండా.. జూనియర్ ఎన్టీఆర్ మూవీ జనతా గ్యారేజ్ లో కూడా మంచి రోల్ చేస్తుండడం విశేషం.