'బృంప్' గా మన 'బ్రహ్మి'

ఇప్పుడైతే బ్రహ్మానందం జోరు తగ్గిపోయింది కానీ.. ఓ మూణ్నాలుగేళ్ల కిందట ఆయన క్రేజ్ మామూలుగా ఉండేది కాదు. సోషల్ మీడియాలో స్టార్ హీరోల కంటే ఆయన గురించే ఎక్కువ చర్చ జరిగేది. బ్రహ్మి ఫేస్‌ ను తమకు నచ్చినట్లుగా మార్చేసి.. ఫేస్ బుక్ లాంటి చోట్ల నెటిజన్లు భలే ఎంజాయ్ చేసేవాళ్లు. లాలూ ప్రసాద్ యాదవ్.. అబ్దుల్ కలాం.. రాహుల్ గాంధీ.. జగన్.. ఒబామా.. ఇలా తాము కోరుకున్న నాయకుడి రూపంలోకి బ్రహ్మిని మార్చేసి జనాలు అప్పట్లో చేసిన రచ్చ అంతా ఇంతా కాదు. ఇంకా సెలబ్రెటీలందరి రూపాల్లోకి బ్రహ్మిని మార్చేసి వినోదించేవాళ్లు మన కుర్రాళ్లు. ఇందుకోసం ప్రత్యేకంగా ఫేస్ బుక్ లో పేజీలే ఉండేవి.

ఐతే ఈ మధ్య బ్రహ్మి జోరు తగ్గిపోవడంతో ఈ తరహా మార్ఫింగ్ లు ఆగిపోయాయి. తాజాగా అమెరికా ఎన్నికల్లో డొనాల్డ్ ట్రంప్ గెలిచిన నేపథ్యంలో ఈ ట్రెండ్ మళ్లీ మొదలైంది. బ్రహ్మిని డొనాల్డ్ ట్రంప్ రూపంలోకి మార్చేసి ఒక ఫొటో వదిలారు నెటిజన్లు. అదే ఇప్పుడు సోషల్ మీడియాలో వైరల్ అవుతోంది. ఏ రూపంలోకి మారిస్తే ఆ రూపంలోకి సులువుగా ఒదిగిపోయే రూపం బ్రహ్మికి సొంతం. అందులోనూ కొన్ని ఫేసులకు బ్రహ్మి భలేగా సూటవుతాడు. ట్రంప్ ఫేస్ కూడా అలాంటిదే. ఎవరు ఈ మార్ఫింగ్ చేశారో కానీ.. భలేగా సూటైంది. ‘డొనాల్డ్ బ్రంప్’ పేరుతో ఈ ఫొటో ప్రస్తుతం నెట్లో హల్ చల్ చేస్తోంది. ట్విట్టర్.. ఫేస్ బుక్కుల్లో ఈ ఫొటో షేర్ చేస్తూ ఎంజాయ్ చేస్తున్నారు జనాలు.

Like Us on Facebook : https://www.facebook.com/Tupakidotcom/