'జాతిరత్నాలు'లో జస్టిస్ బల్వంత్ చౌదరిగా హాస్యరత్నం..!

'ఏజెంట్ సాయి శ్రీనివాస ఆత్రేయ' ఫేమ్ నవీన్ పోలిశెట్టి నటిస్తున్న తాజా చిత్రం ''జాతిరత్నాలు''. ఈ సినిమాలో హాస్యనటులు రాహుల్ రామకృష్ణ - ప్రియదర్శి ఇతర ప్రధాన పాత్రలు పోషించగా.. ఫరియా అబ్దుల్లా హీరోయిన్ గా నటించింది. స్వప్న సినిమాస్ బ్యానర్ పై 'మహానటి' చిత్రాన్ని రూపొందించిన డైరెక్టర్ నాగ్ అశ్విన్ ఈ కామెడీ ఎంటర్టైనర్ ని నిర్మించాడు. అనుదీప్ కేవీ ఈ చిత్రానికి దర్శకత్వం వహించాడు. ఇప్పటికే విడుదలైన ప్రచార చిత్రాలు సినిమాపై ఆసక్తిని కలిగించాయి. ఈ క్రమంలో నేడు ప్రముఖ హాస్య నటుడు బ్రహ్మానందం పుట్టినరోజు సందర్భంగా శుభాకాంక్షలు చెబుతూ ఆయన పాత్రను రివీల్ చేశారు.

'జాతిరత్నాలు' సినిమాలో హాస్యరత్నం బ్రహ్మానందం 'జస్టిస్ బల్వంత్ చౌదరి'గా కనిపించనున్నట్లు చిత్ర యూనిట్ తెలిపింది. చట్టానికీ, న్యాయానికీ జరిగిన ఈ సమరంలో మా హాస్యరత్నం అంటూ బ్రహ్మానందం పోస్టర్ ని కూడా విడుదల చేశారు. ఇందులో జడ్జిగా కనిపిస్తున్న బ్రహ్మీ తనదైన శైలిలో ఎస్ప్రెషన్ ఇచ్చాడు. మరోసారి తన కామెడీతో ఆడియన్స్ ని నవ్వించడానికి రెడీ అయినట్లు తెలుస్తోంది. కాగా, 'జాతిరత్నాలు' చిత్రానికి మనోహర్ సినిమాటోగ్రాఫర్ గా వ్యవహరించగా.. అభినవ్ ఎడిటింగ్ వర్క్ చేశారు. ఈ చిత్రాన్ని శివరాత్రి కానుకగా మార్చి 11న ప్రేక్షకుల ముందుకు తీసుకురానున్నారు. మరి మన హాస్యరత్నాలు థియేటర్స్ లో ఏ రేంజ్ లో నవ్వులు పూయిస్తారో చూడాలి.