పుకార్లన్నింటికి ఫుల్‌ స్టాప్‌

కొన్నాళ్ల క్రితం తెలుగు సినిమా ఇండస్ట్రీలో కామెడీ అంటే బ్రహ్మానందం - బ్రహ్మానందం అంటే కామెడీ అన్నట్లుగా ఉండేది. ఏ మూవీ సూపర్‌ హిట్‌ అయినా కూడా అందులో బ్రహ్మానందం పాత్ర ప్రముఖంగా కనిపించేది. ఎంతో మంది స్టార్‌ హీరోల సూపర్‌ హిట్‌ చిత్రాల్లో బ్రహ్మానందం పాత్ర చాలా కీలకమైనదిగా నిలిచింది. అలాంటి బ్రహ్మానందం గత కొన్నాళ్లుగా తన ప్రాభవాన్ని కోల్పోయాడు. ఈయన ఏ పాత్ర చేసినా కూడా అది కామెడీ పండించలేక పోవడంతో పాటు - మూస తరహాలో బ్రహ్మానందం కామెడీ ఉంటుందని విమర్శలు ఎదుర్కొంటున్నాడు. ఈ సమయంలోనే ఆయన ఆరోగ్యం గురించి రకరకాలుగా వదంతులు వచ్చాయి.

బ్రహ్మానందం ఇటీవల అనారోగ్య కారణంగా ముంబయికి వెళ్లాడు. అక్కడ గుండెకు సంబంధించిన ఆపరేషన్‌ చేయించుకున్నారు. ముంబయిలో ఆపరేషన్‌ కారణంగా ఎక్కువ రోజులు బ్రహ్మానందం అక్కడే ఉండాల్సి వచ్చింది. దాంతో బ్రహ్మానందం ఆరోగ్యంపై రకరకాలుగా పుకార్లు షికార్లు చేయడం మొదలు పెట్టారు. బ్రహ్మానందం ఆరోగ్యం గురించి మీడియాలో వస్తున్న వార్తలకు ఫుల్‌ స్టాప్‌ పడ్డట్లయ్యింది. ఇటీవలే ఆపరేషన్‌ తర్వాత హైదరాబాద్‌ కు వచ్చిన బ్రహ్మానందంను మోహన్‌ బాబు పరామర్శించాడు.

తాజాగా బ్రహ్మానందంను మోహన్‌ బాబు పరామర్శించిన ఫొటో ప్రస్తుతం సోషల్‌ మీడియాలో ప్రత్యక్షం అయ్యింది. దాంతో బ్రహ్మానందం ఆరోగ్యం భేషుగ్గా ఉందని - ఎలాంటి ఇబ్బంది లేకుండా హాయిగా బ్రహ్మానందం ఉన్నారని - త్వరలోనే మళ్లీ కెమెరా ముందుకు వస్తారని ఆ ఫొటోను చూస్తుంటే అర్థం అవుతోంది. బ్రహ్మానందం గురించి ఎలాంటి పుకార్లు వచ్చినా ఇకపై నమ్మనక్కర్లేదు.