అయ్యో.. పవన్ కూడా కాపాడలేదే!!

బ్రహ్మానందం.. చాలా కాలంగా తనదైన స్టాంప్ ఉండి, తన పూర్వ వైభవాన్ని తెచ్చి పెట్టే సినిమా కోసం ఎదురు చూడాల్సిన పరిస్థితిలో ఉన్నాడు. ఒక్క మాటలో చెప్పాలంటే.. స్టైలిష్ స్టార్ అల్లు అర్జున్ మూవీ రేసుగుర్రంలో కిల్ బిల్ పాండే కేరక్టర్ తర్వాత.. ఇప్పటివరకూ గుర్తుండిపోయే పాత్ర ఒక్కటి కూడా చేయలేదు బ్రహ్మానందం.

పవర్ స్టార్ పవన్ కళ్యాణ్ తన లేటెస్ట్ మూవీ సర్దార్ గబ్బర్ సింగ్ తో తనకు బ్రేక్ ఇస్తాడని చాలానే ఆశలు పెట్టుకున్నాడు. ఇందులో చేసిన తూటాల శేఖర్ రాజ్ పుట్ పాత్ర ద్వారా మరోసారి టాలీవుడ్ లో తన రేంజ్ ఏంటో చాటుతానని భావించాడు. కానీ సర్దార్ మూవీ ఫ్యాన్స్ నే డిజప్పాయింట్ చేస్తే.. బ్రహ్మీ పాత్ర గురించి చెప్పుకోవాల్సినది ఏమీ లేదు. ఇదీ బ్రహ్మీ పంచ్ అంటే.. అని చెప్పుకునేందుకు ఒక్కటి కూడా పేలలేదు. పైగా పవన్ ని.. 'అరే సర్దార్ రారా తేల్చుకుందాం' అంటూ చేసే కౌబాయ్ టైప్ హంగామా గురించి ఎంత తక్కువగా మాట్లాడుకుంటే అంత బెటర్.

తన స్టామినాతో స్టార్ హీరోలనే గట్టెక్కించగలడు అనే ఇమేజ్ నుంచి.. ఒక పాత్రయినా తనకు గుర్తింపు తెచ్చేది రాకపోతుందా.. అని ఎదురుచూస్తున్న స్థితికి బ్రహ్మానందం చేరిపోయాడు. పవన్ మూవీ సర్దార్ లో సినిమా అంతా కనిపించే పాత్రలో కూడా బ్రేక్ బ్రహ్మానందంకి బ్రేక్ రాకపోవడం ఆశ్చర్యకరమే.