నింగిలో 'బ్ర‌హ్మాస్త్ర' లోగో ఆవిష్క‌ర‌ణ‌

ప్ర‌చార వైవిధ్యం లేనిదే సినిమాని గుర్తించ‌డం క‌ష్టం. ఏదో ఒక కొత్త‌ద‌నం లేనిదే.. క్రియేటివ్ ఎప్రోచ్ లేనిదే జ‌నంలోకి దూసుకెళ్ల‌డం క‌ష్టం. అందుకే ప్ర‌చార వైవిధ్యం కోసం పాకులాట‌. అది బాలీవుడ్ అయినా.. టాలీవుడ్ అయినా.. ఇంకెక్క‌డైనా వ‌ర్తిస్తుంది. అన్ని ప‌రిశ్ర‌మ‌ల్లో ఇది అనుస‌ర‌నీయం. ఇటీవ‌ల ఈ ప‌ద్ధ‌తి మ‌రింత పీక్స్ కి చేరుకుంది. అమీర్ ఖాన్ - షారూక్ - స‌ల్మాన్ - ర‌ణ‌వీర్ సింగ్ - విజ‌య్ దేవ‌ర‌కొండ‌.. ఇలా అంద‌రూ ప్ర‌చారం వైవిధ్యం కోసం త‌పించిన‌వారే.

తాజాగా అదే పంథాలో క‌ర‌ణ్ జోహ‌ర్ నిర్మిస్తున్న భారీ మల్టీస్లార‌ర్ `బ్ర‌హ్మాస్త్ర‌` ప్ర‌మోష‌న్ సాగింది. బిగ్‌ బి అమితాబ్‌ బచ్చన్‌ - రణ్‌ బీర్‌ కపూర్‌ - అలియాభట్ లాంటి స్టార్స్‌ ముఖ్య పాత్రలు పోషిస్తున్న ఈ సినిమాలో టాలీవుడ్‌ కింగ్‌ నాగార్జున ఓ కీలకపాత్రలో పోషించిన సంగ‌తి విదిత‌మే. మ‌హాశివ‌రాత్రి కానుక‌గా అభిమానుల కోసం ఈ సినిమా లోగోని వైవిధ్యంగా లాంచ్ చేశారు. నింగిలోకి బ్ర‌హ్మాస్త్రం సంధించ‌డం ఇక్క‌డ ఆస‌క్తి క‌లిగించే విష‌యం.

గ‌త కొంత‌కాలంగా ప్ర‌యాగ స‌హా కాశీ, వార‌ణాసి లో శివ‌ భక్తులు ప్ర‌త్యేక పూజ‌లు నిర్వ‌హిస్తున్నారు. కుంభ‌మేళా పేరుతో హోమాలు జ‌రుగుతున్నాయి. ప్ర‌పంచ‌వ్యాప్తంగా జ‌నం దృష్టి ఈ కుంభ‌మేళాల‌పై నిలిచి ఉంది. అందుకే ఈ వేదిక వ‌ద్ద బ్ర‌హ్మాస్త్ర లోగోని లాంచ్ చేశారు. అది కూడా నింగిలో లోగోని లాంచ్ చేయ‌డం అనేది సంథింగ్ స్పెష‌ల్ గా నిలిచింది. డ్రోన్ల సాయంతో ఈ లోగోని ఆవిష్క‌రించడం ఆశ్చ‌ర్యాన్ని క‌లిగించింది. చూప‌రుల‌కు అదో బ్ర‌హ్మాండంలా అనిపించింది. అఘోర విన్యాసాల న‌డుమ లోగో లాంచ్ అన్న ప్లాన్ పెద్ద రేంజులోనే వ‌ర్క‌వుటైంది. ఈ కుంభ‌మేళాలో చిత్ర‌యూనిట్ పూజ‌లు ఆచ‌రించింది. ఈ కార్యక్రమంలో రణ్‌బీర్‌ కపూర్‌ - అలియా భట్‌ - అయాన్‌ ముఖర్జీ పాల్గొన్నారు. ధర్మ మూవీస్ ప‌తాకంపై కరణ్‌ జోహార్‌ నిర్మిస్తున్న ఈ చిత్రానికి `ఏ జవానీ హై దీవానీ` ఫేమ్‌ అయాన్‌ ముఖర్జీ ద‌ర్శ‌క‌త్వం వ‌హిస్తున్నారు. 2019 మోస్ట్ అవైటెడ్ మ‌ల్టీస్టార‌ర్ గా ఇప్ప‌టికే బ్ర‌హ్మాస్త్ర పేరు మార్మోగుతోంది. ఇందులో కింగ్ నాగార్జున న‌టిస్తుండ‌డం ప్ర‌త్యేక ఆక‌ర్ష‌ణ అన‌డంలో సందేహం లేదు.