‘బాహుబలి’ బాటలో ‘బ్రహ్మోత్సవం’

బ్రహ్మోత్సవం అనే మాట వినిపించగానే శ్రీ వేంకటేశ్వరుడు.. తిరుపతి-తిరుమల గుర్తుకొచ్చేస్తాయి. ఏటా జరిగే బ్రహ్మాండ నాయకుడి బ్రహ్మోత్సవం తెలుగు వారందరికీ కనుల పండుగే. ఐతే కొత్త ఏడాదిలో పైన తిరుమలలో శ్రీనివాసుడి బ్రహ్మోత్సవ వేడుక జరిగితే.. కింద తిరుపతిలోనూ ‘బ్రహ్మోత్సవం’ సంబరం జరగబోతోంది. ఐతే ఈ బ్రహ్మోత్సవం శ్రీనివాసుడిది కాదు. మహేష్ బాబుది. శ్రీకాంత్ అడ్డాల దర్శకత్వంలో మహేష్ నటిస్తున్న ‘బ్రహ్మెత్సవం’ ఆడియో వేడుకను తిరుపతిని వేదికగా ఎంచుకున్నట్లు సమాచారం. ఇది ‘బ్రహ్మోత్సవం’ నిర్మాత పొట్లూరి వరప్రసాద్ ఆలోచనట. ఫిబ్రవరి లేదా మార్చి నెలలో తిరుపతి వేదికగా ‘బ్రహ్మోత్సవం’ ఆడియో వేడుక నిర్వహించాలని ఆయన భావిస్తున్నారు.

ఈ ఏడాది ‘బాహుబలి’ ఆడియో వేడుక కూడా తిరుపతిలోనే చేశారు. ఆ సినిమా ఎలాంటి విజయం సాధించిందో తెలిసిందే. ఆ సెంటిమెంటును దృష్టిలో ఉంచుకుని తమ సినిమా ఆడియో ఫంక్షన్ కూడా తిరుపతిలో చేయాలనుకుంటున్నారు. జనవరి 1న ‘బ్రహ్మోత్సవం’ ఫస్ట్ లుక్ పోస్టర్ విడుదలయ్యే అవకాశాలున్నట్లు చెబుతున్నారు. ఇప్పటికే 60 శాతానికి పైగా షూటింగ్ పూర్తయింది. ఇటీవలే యూనిట్ అంతా కలిసి ఊటీ షెడ్యూల్ పూర్తి చేసుకుని హైదరాబాద్ వచ్చింది. ప్రస్తుతం మహేష్ ఫ్యామిలీతో కలిసి వెకేషన్లో ఉన్నాడు. ఆ తర్వాత కొత్త షెడ్యూల్ మొదలుపెడతాడు. మహేష్ సరసన సమంత, కాజల్, ప్రణీత నటిస్తున్న ఈ సినిమా ఏప్రిల్లో ప్రేక్షకుల ముందుకు రానుంది.